Алтынкөл станциясының теміржолшылары жәрмеңке ұйымдастырды
Қазақстандағы Жастар жылы аясында Алтынкөл станциясының теміржолшылары аз қамтылған отбасыларын қолдау мақсатында «тәтті жәрмеңке» ұйымдастырды.
Шараны станцияның кәсіподақ ұйымымен бірге жастар ісі жөніндегі кеңес өткізді.
– «Қайырымдылық жасау – өте жеңіл» ұранымен өтіп жатқан бүгінгі жәрмеңке дәстүрге айналған. Биыл біздің бастамаға қызығушылық білдірген қатысушылар саны артып отыр, – дейді Алтынкөл станциясының кадр жөніндегі инспекторы Әйгерім Мұқажанова.
Алтынкөл станциясының әкімшілік ғимаратының бірінші қабатында орналасқан жаңа ғана пісірілген дәмділер мен түрлі тағамдар көздің жауын алады. Оларды сатқаннан түскен ақша мұқтаж жандарға берілмек. Осы жолы ұйымдастырушылар 190 000 теңге жинап алыпты. Жәрмеңкеге СТЦ, Алтынкөл станциясының басқару аппаратының теміржолшылары, пойыз қабылдаушылар, тауарлық кеңсе және табыстау кеңсесінің, актілік-шағым бөлімінің мамандары, жүк және багаж қабылдап-тапсырушылар қатысты.