Жамбыл жүк тасымалы бөлімшесінде көктемгі сынақ қортындыланды
«ҚТЖ – Жүк тасымалы» АҚ филиалы – Жамбыл жүк тасымалы бөлімшесінің директоры Берік Ақшаловтың төрағалығымен бөлімшеде көктемгі комиссиялық тексеру жұмыстарының қорытындысы талқыланған шұғыл кеңес өтті.
Оған жүк тасымалы және магистральдық желі бөлімшелеріне қарасты барлық құрылымдар мен станция басшылары қатысты. Кеңестің күн тәртібінде қос бөлімшенің құрылымдарында ағымдағы жылдың 9-23 сәуір күндері аралығында жүргізілген көктемгі комиссиялық тексеру шараларының қорытындысы негізінде бірқатар басшылардың баяндамалары тыңдалды. Солардың ішінде Жүк тасымалы бөлімшесінің бас инженері Анатолий Кимнің хабарламасында комиссиялық тексерудің барлық қорытындысы, кеткен кемшіліктер мен тиісті ұсыныстары айтылды.
– Көктемгі комиссиялық тексерудің қорытындысы бойынша жүк тасымалы бөлімшесі құрылымдары шаруашылықтары қыстан қысылмай, оңды нәтижемен шыққанын көрсетті. Осы ретте Талас, Аса, Бүгін, Весна, Жиделі, Бірлік, Шөлдала, Үшбұлақ, Тараз станциялары мен Шу пайдалану депосының жұмысын ерекше атап өтуге болады. Сондай-ақ, жіберілген кемшіліктер де жоқ емес. Айталық, Сарышаған, Мыңарал, Шу, ОП-115, Сұрым, Шоқпар, Малдыбай және Қияқты станцияларында техникалық оқыту жұмыстарын өткізу кестесі жоқ. Яғни, мұндағы жұмысшылардың техникалық дайындығы төмен деген сөз. Сондай-ақ, бақылау посты жұмысы бойынша тіпті бөлімше құрылымдарының ішінде үнемі алда жүретін Ақшолақ станциясының бұл жолы бақылау постының дайындығының жоқтығы да белгілі болды, – деген бас инженер бұдан өзге де атқарылған жұмыстар мен кемшіліктерге тоқталып, басшылықтың шара қолдануы жөнінде өз ұсынысын айтты.
Жалпы, жиында станциялардағы мәселелерден бөлек вагон, локомотив, жол, электрмен жабдықтау, сигнализация және байланыс шаруашылықтары мен еңбекті қорғау бойынша да жақсы нәтижелер мен жіберілген кемшіліктер жайы сөз болды. Дегенмен, комиссиялық кеңес отырысының қаулысымен құрылым басшыларына жауапты қызметкерлерін жіберілген кемшіліктер бойынша тәртіптік жауапкершілікке тарту жөнінде тапсырмалар берілді. Сондай-ақ, Жамбыл магистральдық желі бөлімшесінің директоры Асқар Көккөзовқа сын-ескертпелерді белгіленген мерзімінде ретке келтірілуін, құрылымдық мекемелер басшыларының пойыздар қозғалысы мен еңбекті қорғау жөніндегі жеке нормативтерінің орындалуын қадағалау ісі жүктелді.
Жасұлан СЕЙІЛХАНОВ