Таразда «Вокзалдағы қабылдау» акциясы өтті
Тараз станциясындағы темір жол вокзалында «Вокзалдағы қабылдау» акциясы өтті. Онда сала мамандары азаматтарды барлық жеке сұрақтары бойынша қабылдады.
Акция аясында қабылдау жүргізген Көліктегі ПД Тараз станциясы ЖПБ әкімшілік полиция бөлімшесінің бастығы, полиция майоры М.Дүйсембиев, көші-қон қызметі тобының инспекторы, полиция капитаны А.Маханов, Жамбыл көлік прокуратурасының прокуроры А.Дондаева, Тараз станциясы темір жол вокзалы бастығының міндетін атқарушы М.Садығұлов пен «Жолаушы тасымалы» АҚ аға билет кассирінің міндетін атқарушы А.Әбілдаева әрқайсысы өз саласы бойынша азаматтардың сұрақтарына жауап беріп, түсіндіру жұмыстарын жүргізді.
Іс-шара барысында қайырылған азаматтардың басым көпшілігінің сауалы пойыз билеттерінің тапшылығына және қала маңына қатынайтын пойыздардың не себепті жүрмей қалғанына байланысты қойылды.
Таңертеңнен түске дейін жалғасқан акцияға 15-тен астам жолаушы келіп, көкейлеріндегі сұрақтарына жауап алды. Ұйымдастырушылардың айтуынша, алдағы уақытта осындай акциялар тұрақты түрде өткізілмек.