Апат салдарын жоюда

Ел шығысындағы Аягөз станциясында маусымның 16 күнгі кешкі сағат 18:30 мөлшерінде орын алған алапат дауылдан соң өңір бойынша төтенше жағдай режимі жарияланды. Қазіргі күні жойқын желдің салдарын жоюға жергілікті теміржолшылар да қатысуда.

Тоқтала кетсек, дәл осы күні жылдамдығы секундына 28 метрге дейін жететін жел тұрып, қала ішінде алапат құйын ойран салып өткен болатын.

Бір айта кетерлігі, «Қазгидромет» мамандарынан және жергілікті төтенше жағдайлар басқармасынан алдын ала дауыл болатыны жайлы ескерту хабарлама алған теміржолшылар бұл күні кешкісін кезекшілікке көп жиналған еді. Жергілікті ШЧ-30, ПЧ-42, ТЧЭ-25, Аягөз станциясы және өзге де еншілес мекемелер қызметкерлері де жұмыс орындарында болуы керектігі туралы алдын ала шақырту алған еді.

Апат орын алған санаулы минуттардан соң барлығы бір кісідей желі бойына шығып, басшылықтың нұсқауымен сенбілік жұмыстарын бастап кетті.

Атап айтсақ, жол бойына түскен бұтақтар мен ағаштар, тұрғын үйлерден ұшқан шатырлар, темір қоршауларды тазартуға екі күннен аса уақыт кетті. Желі бойындағы мұндай жұмыстар қазіргі күні де жүргізіліп жатыр.

– Алдын ала ескерту келгендіктен дүлей желге дайын болдық. Станция басындағы бос тұрған вагондардың қауіпсіздігі күшейтіліп, қосымша башмактар қойылды. Қала бойынша электр қуаты сөніп қалғанымен желі бойында ондай келеңсіздікке орын берілмеді. Шаһарда жарақаттанғандар көп. Алайда, теміржолшылардың барлығы да дін аман. Пойыз қозғалысына кедергі туындаған жоқ. Жылжымалы құрамдардың барлығы уақытында жөнелтілді, – дейді пікір білдірген Аягөз станциясы бастығының шұғыл жұмыстар бойынша орынбасары Біржан Нұрекеев.

Бүгінде 40 мыңға жуық халық тұратын станцияда бес мыңға таяу теміржолшы қызмет етуде. Қазіргі күні қалада төтенше жағдай режимі жарияланған. Барлық мекеме қызметкерлері шығындарын есептеп, дауыл салдарын жоюға атсалысуда.