Қиыршық тасы жаңартылды

Ақтөбе жол дистанциясының теміржолшылары биылға жоспарланған кешенді жөндеу жұмыстарын аяқтады. Қызғалдақты торабы мен Қорайлы станциясы аумағында ХДВ, РШР, ДГС, ПБР сынды арнайы техникалармен жолдың қиыршық тасы жаңартылған. Нәтижесінде 14 км жол табанының кем-кетігі түзетіліп, қалпына келтірілді.

Биыл елде қауіпті індеттің таралуы, соған орай төтенше жағдай жариялануы мен карантин мерзімінің ұзартылуына қарамастан теміржолшылар жол жөндеу жұмыстарын уақытымен жасап келеді. Жоспарлы жұмыс тоқтаған жоқ. Жолды жаңғырту жұмыстары пойыздың жүру жайлылығын қамтамасыз етумен қатар пойыздар жылдамдығын да арттыратыны белгілі.

«Ақтөбе аумағында жоспарланған кешенді жөндеу жұмыстарын аяқтадық. Қорытындылау жұмыстары Қызғалдақты торабы мен Қорайлы станциясы аумағында өтті. Әр жердегі жұмыс ауқымы мен көлеміне қарай белгіленген уақытта үлгердік. Қиыршық тастарды реттейтін арнайы техникалар кезегімен іске қосылып, жұмыстар өз уақытында аяқталды», – дейді Ақтөбе жол дистанциясы бастығының орынбасары Дархан Орынбаев.

Теміржол бойындағы жаңбырмен ойылып қалған тұстарға РМ80 техникасы пайдаланылған. Мамандардың айтуынша, мұндай ойықтар машинистердің ұсынысы негізінде ескеріліп, негізге алынып отырады. Жолды оңалту жұмыстары кезінде осындай ойықтар жоспарлы жөндеуге алынады. Себебі жөндеу уақытында жасалмаса, ойық көлемі бір шақырымға дейін созылып кетуі мүмкін.

«Теміржолдағы басты мәселе – қауіпсіздік, сондықтан табиғи құбылыстармен ойылып қалған осындай жерлерде пойыз жылдамдығын азайтады. Жылжымалы құрам қозғалысы сағатына 100 км болса, мұндай жерлерде қауіпсіздік мақсатында жылдамдық 60 км дейін шектеледі. Қиыршық тас тазалайтын РМ-80 техникасынан кейін оны тасымалдауға арналған машина іске қосылады. Әрі қарай таза қиыршық тас төгіліп, келесі техникамен әр шпалдың арасы бекітіледі. Осылайша кезең-кезеңімен атқарылған жұмыстар Ақтөбе аумағында тиянақты аяқталды», – дейді Дархан Орынбаев.

Өңірде жөндеу жұмыстары 23 мамырда басталған еді. 65 шақырымға жуық жолға жоспарланған күрделі жөндеу жұмыстары уақытында аяқталды. Ескі теміржол төсемдері Ақтөбе рельс арқалық зауытының өнімдерімен жаңартылды.

Отандық өнім елдегі теміржол қызметінде жоғары бағаға ие, жолшылар сенімінен шыққан. Жазғы жол жөндеу техникалары қазіргі уақытта Орал дистанциясы аумағында жоспарлы жөндеу жұмыстарын жалғастырып жатыр.