Пандемия өршіген кезде жолсеріктерге рахмет

Бетперделер мен респираторлар коронавирус пандемиясының символына айналды. Соңғы бірнеше айда індет әлем келбетін толығымен өзгертті. Миллиондаған адам үйде отыруға мәжбүр болып, медициналық маскалар мен қолғап және антисептик түрлері әлемде сұранысы жоғары, танымал тауарға айналды.

Ғимараттар, вокзалдар, вагон терезелеріне дейін медициналық бетпердемен жүру керектігі жазылған ескертпелер ілінген. Ақтөбе теміржол вокзалы қоғамдық орында жүруге арналған карантиндік талаптарды қатаң ұстап тұр.

Билет алу, перронға шығу кезінде екі метрлік қашықтық сақталып, вокзалға бет пердесіз кіргізілмейді.

Вокзал радиосы арқылы елде тараған індет, карантиндік жағдай, карантиндік талаптардың сақталуы тұрақты хабарланып отыр. Жолаушылар пойызы әр рейс сайын міндетті түрде дезинфекциядан өтеді. Ал вагондарға жолаушыларды отырғызу тәртібін арнайы мобильді топтар бақылап жүр.

«Қазір теміржол қызметін тұтынатын жолаушылардың өзі бұрынғыдай бетпердеге салақ қарамайды. Сақтық шараларына мейлінше сақ. Қорғаныш құралы жоқ жүргінші көрсе, жолаушылардың өзі маска мен жүруді талап етеді», – дейді вокзал кезекшісі Әсел Тақбаева.

Жергілікті билік тарапынан жолаушы тасымалы қызметімен айналысып отырған мекемелер мобильді топтармен бақылауға алынған. Облыс әкімінің бірінші орынбасарының айтуынша, теміржол вокзалы, автовокзал және қалаішілік қоғамдық көліктердің дезинфекциялануы қамтамасыз етілген. Санитар мамандар рейд жұмыстарын тұрақты жүргізіп тұрады.

«Сақтану керек. Жағдайды көріп отырмыз. Қаншама ағайынымыз қаза болды. Індетке сенбеске амал қалмады. Пойыздарда тәртіп күшейген. Дәретханалар химиямен бірнеше рет тазартылады. Жолсеріктер вагон ішінде себепсіз жүрмеуді ескертіп, қарт кісілерге ыстық суды өздері әкеліп беріп жатқанын көрдік. Вагон іші қайтақайта ылғалдап жуылып жатыр. Мынадай кезде жолаушы тасымалдау да оңай емес, жолсеріктерге рахмет», – дейді жолаушы Мәнсия Ибрашева.