Аягөз станциясында ескерткіш тақта орнатылды
Абай облысы бойынша меншікті тілші
Теміржолшылардың кәсіби мерекесіне орай және де Түрксіб теміржолының 90 жылдық мерейтойына байланысты шығыстағы Аягөз станциясында шағын да болса ерекше шара өтті.
Атап айтсақ, осынау күні Аягөз жол дистанциясында даңқты теміржолшы, Түрксібтің құрыш білекті құрылысшысы Молбазар Ботақановқа арналып ескерткіш тақта орнатылды.
Аталмыш шараға Аягөздегі ПЧ-42 мекемесі басшылығы мен аудандық әкімдік ұйытқы болды. Карантиндік шектеулер себепті бұл шараға көп адам жиналған жоқ. Тек жергілікті теміржол мекемелері басшыларымен М.Ботахановтың ұрпақтары, даңқты тұлғаның көзін көрген ардагерлер қауымы келді. Тоқтала кетсек, «Ленин», «Еңбек Қызыл ту» ордендерінің иегері, Құрметті теміржолшы болған Молбазар ақсақал теміржол саласына 1928 жылы 28 жасында келіпті.
Түрксіб құрылысын салған соң жергілікті теміржол саласына тұрақты қызметке орналасып, еңбек жолын даңқты түрде жалғастырған жан. Өткен ғасырдың 70-жылдарына дейін қызмет атқарған Молбазар Ботаханов көптеген кәсіби сала мамандарын да тәрбиелеп шығарған, Аягөз бен Жармадағы үлкен мектептің іргесін қалаушы саналады.
Жиын барысында ардагерлер қауымы, Құрметті теміржолшының көзін көрген байырғы әріптестері сөз сөйлеп, ізгі тілек білдірді. Содан соң жиналған қауым естелік ретінде арнайы фотосуретке түсті.