Теміржолшыларды әлеуметтік желіде құттықтады
Ақтөбе облысы бойынша меншікті тілші
«Nur Otan» партиясы Ақтөбе облыстық филиалы төрағасының бірінші орынбасары Ербол Данағұлов Facebook желісі арқылы теміржолшыларды төл мерекесімен құттықтады. Билік партиясы басшысының жылы лебізі теміржолшылардың мерейін өсірді.
Өңірдің бас теміржолшысы, Ақтөбе ЖТ бөлімінің басшысы Бөріхан Беркімбаев – теміржолшылар мүддесін билік өкілдеріне құлағдар етіп жүрген мәслихат депутаты. Сала еңбеккерлері арасында да нұротандықтар аз емес. Филиал төрағасының бірінші орынбасары теміржолшылар – ел тамырына қан жүгірткен алып саланың майталман мамандық иелері екенін баса айтқан. Індет кезінде де жұмыла еңбек майданынан табылған теміржолшыларға алғыс білдірген.
«Биыл коронавирус пандемиясы жер бетінде кеңінен тарағанына қарамастан теміржолшылар жаңа жағдайда жұмыс істеуге дайын болып, кез келген қиындықты еңсере алатындықтарын дәлелдеді. Жолаушының жол азабын азайтып, айшылық алыс жерлерге аманесен жеткізіп келеді. Осынау жауапты қызметтегі біліктіліктері мен көлік қатынасы саласындағы сүбелі үлестеріңізді біз әрдайым жоғары бағалаймыз. Жарты ғұмырын шойын жолда өткізіп жүрген сіздерге мықты денсаулық, толайым табыс, отбасылық амандық және несібелі жетістіктер тілеймін!» делінген құттықтау хатында.
Желідегі жазба астында теміржолшылардың да тілегі жүр. Алғыс білдіргендер қатарында отбасылық мереке екенін айтқан теміржолшылардың балалары мен зейнеттегі теміржолшылар бар.