Алты айда - 62 оқыс тежеу
Маңғыстау облысы бойынша меншікті тілші
Өткен аптада Баянды ауылындағы мал ұстайтын тұрғындарды аралап, теміржол бойында мал жаймау жөнінде түсінік жұмыстары осы аптада Емір елді мекенінде жалғасты.
Ұйымдастырушылардың апта сайын ауыл-ауылды аралап, рейдтік шараны өткізуіне себеп – соңғы кездері теміржолға шығатын малдардың кесірінен тепловоздардағы шұғыл тежеулердің жиілеуі.
Бұл жолы да Маңғыстау жол дистанциясының және Маңғыстау станциясындағы желілік полиция бөлімшесінің қызметкерлері әкімдік өкілдерімен бірлесе отырып Емірде тұратын тұрғындардың үйлерін аралап, мал ұстайтын отбасыларға теміржол бойына жайылған малдың тепловоздардың алдына шығып кетуінің алдын алуға шақырды. Соның салдарынан тепловоздардың жедел тежеу фактілері көбейіп, пойыздардың мал басу оқиғалары тіркеліп жатқанын түсіндірді. Малды темiржол бойына жайғаны үшін, ҚР ӘҚБтК-нің 559-бабы 1-бөлігінде көрсетілгендей, әкімшілік жауапкершілікке тартылатынын ескертті.
Жыл басынан бергі алты айда 62 оқыс тежеу тіркелген. Оның ішінде 8 мал басу дерегі. Өкінішке орай, түрлі себептермен шұғыл тежеуге соқтыратын мұндай жайттарды анықтау оңайға соқпайды. Бірақ ерте ме, кеш пе, мал иесі табылып, жауапкершілікке тартылады. Сол 62 оқыс тежеу жағдайының бүгінге дейін 12-сі ашылыпты. Төртеуінде теміржолды адам кесіп өткені үшін, қалғаны малға қатысты. Осы аталған фактілер бойынша тиісті хаттама толтырылып, әкімшілік шара қолданылған.
«Ауырып ем іздегенше, ауырмайтын жолын ізде» дегендей, жедел тежеулердің алдын алу жұмыстары жалғаса бермек.