Міндет - кемшілікті жою

Ақтөбе ЖТ бөлімшесі аумағында Орал өңірін қосқанда 115 станция, 4 локомотив пайдалану депосы, 2 вагон жөндеу депосы бар. Бөлімше Қостанай, Атырау, Қызылорда, Маңғыстау өңірлерімен жалғасады. Аймақта қозғалыс қауіпсіздігін қамтамасыз етіп, жоспарлы түрде профилактикалық жұмыстар жүргізіп отырған ревизорлардың еңбегі зор.

«ҚТЖ» ЖТ» АҚ Ақтөбе жүк тасымалдау бөлімшесі филиалының қозғалыс қауіпсіздігі қызметінің бөлім бастығы Айболат Дарбаев жыл басынан жасалған жұмыстарды қорытындылады. 2020 жылдың алғашқы алты айында бөлімшеде 5 рет қозғалыс қауіпсіздігінің бұзылу жағдайы тіркелді. Жүргіншілердің қауіпсіздікке бейжай қарауынан қайғылы оқиғалардың орын алуы тоқтар емес.

Теміржолшылар сақтық шараларын күшейткен. Вокзал және көшедегі LED экрандар арқылы әлеуметтік ролик жасалып, жергілікті әкімшілікпен бірлесіп, қауіпсіздіктің алдын алу, түсіндіру жұмыстары жүргізіліп жатыр.

«Нұсқаушы-ревизор құрамының қозғалыс қауіпсіздігін қамтамасыз етуге қатысты қызметтік міндеттерін орындамауы анықталса, шара қолданылады. Анықталған кемшіліктер жойылғанға дейін ақаулы жолдар мен бағыттамалық бұрмалардың қозғалысы шектеледі. Норматив бойынша бөлімшеде ай сайын қауіпсіздікке қатысты жиын өтеді, теміржол бойында бейқамдықты болдырмау, қауіптің алдын алуға негізделген барлық шара жасалады», – дейді қозғалыс қауіпсіздігі қызметінің бөлім бастығы.

Мұнымен қоса бөлімшеде айына үш рет қауіпсіздік күні белгіленген. Биыл COVID-19 инфекциясының таралу қаупіне, адам жинауға шектеу қойылуына байланысты бірқатар шаралар өткен жоқ. «Қауіпсіздікті жіті бақылауында ұстап отырған 9 ревизор бар. Әр ревизор өз аумағына жауапты.

Одан басқа тағы локомотив шаруашылығына жауапты екі ревизор және вагон шаруашылығына жауапты бір ревизор бар. Негізгі жұмыс – кемшілікті табу емес, оны жою, болдырмау. Қауіпсіздіктің алдын алу негізінде қадағалаулар жасалып, техникалық сабақтар ұйымдастырылады.

Ай сайын қарамағындағы барлық бекетті бір аралап шығатын ревизор жұмысы пандемия жағдайында да тоқтаған жоқ», – дейді Айболат Дарбаев.