Байланыс жүйесі жаңарып-жаңғыруда

Қозғалыс қауіпсіздігінің сақталуына байланыс саласының маңызы зор. Өңірде соңғы жылдары «Тальго» жүрдек пойызының жүруіне орай, Мақат станциясының екі шет жағынан, Жамансор, Мұқыр, Жантерек, Ескене және Теңдік станияларында қорғалатын, күзетілетін, автошлагбаумы бар барлығы 7 өткел салынған. Ақжайық белгі беру және байланыс дистанциясы бүгінде 22 өткел жұмысын қадағалап отыр.

Пойыз келе жатқанда 1,5 шақырым бұрын басқа жолдардың бәрі жабылып, шағын станцияларда белгі беру құралдары дыбыс бере бастаса, үлкен станцияларда пойыздың келе жатқаны репродуктор арқылы хабарланады. Жолда жұмыс жасап жүрген не басқа да адамдарға пойыздың келе жатқаны туралы сигнал, яғни ескерту беріледі.

Әрине, байланыс қалыпты болу үшін қондырғылар мен құралдар, оларға қажетті қосалқы бөлшектер уақытылы жаңартылып, ауыстырылып отыруы, соның ішінде ең алдымен бағдаршамдар дұрыс жұмыс жасауы тиіс. Соған орай, Махамбет станциясында, 4, 15 бекетте бағдаршамдар жаңартылды. Сол секілді Ганюшкино, Махамбет, Исатай, Аққыстау, Тумманное, Д.Нұрпейсова, т.б. станцияразъездерде релелік шкафтар, ТШ-2000 релелері ТШ-65-ке, жерүсті кабельдері жерастына, КТСМ қондырғылары жаңасына алмастырылып, белгі беру мен байланысты жақсарту мақсатында көптеген жұмыстар жүргізілген. Соңғы технологияларға сай бұрынғы ПОНАБ қондырғысы жетілдірілген КТСМ-02 қондырғысымен жаңартылды. Енді жаңа жүйеге сәйкес, жол бойындағы барлық жағдай станция кезекшісінің бөлмесіндегі таблода көрсетіліп тұрады да, рельсте қатты үйкеліс болып қызып келе жатса, не басқа жағдайда белгі автоматты түрде беріліп отырады. Соған орай, аймақтағы белгі беру-байланыс дистанциялары пойыздар кідірісін болдырмай, темір жол қауіпсіздігін қатаң сақтауда жүйелі жұмыс жасап келеді. 2020 жылдың бірінші жартыжылығында Ақжайық, Атырау, Құлсары дистанциялары СЦБ байланыс, КТСМ және радио қондырғыларға техникалық қызмет көрсету бойынша «жақсы» деп бағаланып, жұмыста ақау болмаған.

– 2020 жылдың құрылғыларды күтіп ұстау негізінде жасақталған кешенді жоспары бойынша өткен 6 ай ішінде 69 электржетек ағымдық жөндеуден өтіп, ауыстырылды. Атап айтқанда, ШЧ-8 Атырау дистанциясында 18 дана, ШЧ-9 Ақжайық дистанциясында 20 дана, ШЧ-11 Құлсары дистанциясында 31 дана электржетек жаңасына алмастырылды. Қазіргі таңда дистанцияларда құрылғыларды күтіп ұстау, ауыстыру жұмыстары жалғасып жатыр. Сонымен қатар, аралықтардағы автобұғаттау желісі еңістерінің монтаж сымдары, жол жәшіктері мен стрелка қорапшалары, релелік және батарея шкафтары, аккумуляторлар, магистральды желі кабельдері де ауыстырылуда. Ал, вагон дөңгелектерінің қызуын бақылайтын КТСМ құрылғылары кесте бойынша жылына 2 рет профилактикалық тексеруден өтіп тұрады. Жоғарыда айтқанымыздай, бағдаршамдардың қозғалыс қауіпсіздігін сақтаудағы орны ерекше. Соған сәйкес, қазіргі уақытта бағдаршамдардың көрінімін жақсарту мақсатында Атырау-Мақат-Сағыз, Атырау-Д.Нұрпейсова бекеттері аралығы мен станцияларда жарық диодты линзалық шам жинақтарын ауыстыру жұмыстары жүргізіліп жатыр. Сондай-ақ, маятникті трансмиттерлі аспаптар жаңадан модернизацияланған түйіспесіз аспаптарға ауыстырылуда. Бұдан соң байланыс тіптен жақсара түсетіні анық, – дейді Атырау магистральдық желі бөлімшесі директорының орынбасары Жәнібек Жөнтұрбаев.