Шұғыл тежеудің салдары
Шымкент қаласы бойынша меншікті тілшісі
Шымкент жол дистанциясы бойынша жыл басынан бері 7 ай ішінде 3 оқиға орын алған. Оның екеуі – пойыздың адам қағып кетуі, ал біреуі – жүріп бара жатып берілген белгіні жауып қалу дерегі.
Жалпы, дистанция телімінде жыл басынан бері пойыздарды шұғыл тоқтатудың 42 фактісі тіркелген. Шұғыл тежеудің салдары – екі адам басу, бір мал басу оқиғаларымен аяқталса, қалғаны – қағып кеткен немесе алдын алған жағдайлар.
Жыл басында 28 наурыз күні Шымкент-Қорғасын өткеліндегі тақ жолдағы 2511 пикетте ВЛ-80С №2572 электровоз машинисі 30 км/с жылдамдықпен келе жатып, жолда адамды көріп қалып, оқыс тоқтауға мәжбүр болған. Алайда әлгі адам оқиға орнында тіл тартпай кеткен. Анықтай келе, 1961 жылы туылған азаматтың масаң күйде жолға шығып кеткені белгілі болды.
Ал 7 шілде күні Манкент-Қызылсай өткеліндегі 3313 км 1 пикеттің тақ жолында ВЛ-80С №1979 электровоз машинисі 55 км/с жылдамдықпен келе жатқан кезде жолға шығып кеткен адамды байқап қалып, кілт тоқтаған. Мұнда суицид жасамақ болып жолға әдейі шыққан 30 жастағы ер адам оқиға орнында қайтыс болды.
Шымкент жол дистанциясының иелігіндегі телімнің пайдаланудағы ұзындығы – 206,7 км. Оның ішінде екі жолды участок – 160,6 км, бір жолды участок 46,1 км құрайды. Дистанция жолының жазылмалы ұзындығы – 531,4 км. Оның басты жолы – 373 км, ал станция жолдарының ұзындығы – 158,4 км.