50 шақырым жолға қоршау орнатпақ

Ақтөбе магистральдық желі бөлімшесі темір жол бойына малдың шығып кетуінің алдын алу мақсатында биыл 50 шақырым жолға қоршау орнатпақ. Бүгінгі күні бұл жұмыстың 29 шақырымы аяқталған.

Қазіргі уақытта Алға, Бестамақ, Қорайлы, Қызғалдақты станцияларының аумағында темір жол бойына қоршау орнату жұмыстары жүріп жатыр. Барлық жұмыстар теміржолшылардың өз күштерімен жасалуда. Сым тарту үшін жарамсыз болып қалған ағаш шпалдар жол бойына қағылып қойылған.

Теміржолшылардың қоршаулар орнатуды арттыруы иесіз малдың жол бойына шығып кетіп, пойыз қозғалысына қауіп төндіру фактісінің ұлғайып кетуінен болып отыр.

«Жол бойына қоршаулар орнатуға қатысты белгілі жоспар жоқ. Десек те, қауіпсіздік үшін жылда мұндай жұмыстар қолға алынады. Бүгінде 29 шақырымға қада қағылып, сым тартылды. Күзге дейін 50 шақырымға жеткіземіз», – дейді магистральдық желі бөлімшесі жол бөлімінің бастығы Бауыржан Хамзин.

Жол шеберлері жергілікті елді мекендердің басшылары мен фермерлік шаруашылықтарға хабарласып, теміржол маңына малдың жайылу тәртібін тұрақты қадағалап отыруын талап етуде.

«Бұрын адамдар теміржолдан қорқып, жол бойына малдың шығып кетпеуін қадағалап отыратын. Қазір, керісінше, жол бойына шығып кететін бейсауыт адам мен малдан біз қорқып, қорғанып отырамыз. Жылжымалы құрамның қауіпсіздігін қамтамасыз ету үшін тек жөндеу жұмыстарын ғана емес, тазалықты да қадағалаймыз. Өткелге тұрғындар көп қоқыс тастайды. Оны да теміржолшылар тазартады», – дейді Ақтөбе жол дистанциясының оныншы айналым жол шебері Нұрлан Жұматаев.