Бағыттамалар қалпына келтіруде
Шымкент қаласы бойынша меншікті тілшісі
ПЧ-53 – шымкенттік жолшылар жыл басынан бері істен шыққан 4 бұрма бағыттамасын анықтады. Мәселен, осы жылдың ақпан айында Түлкібас-Шымкент учаскесіндегі Ынтымақ станциясында электровоздың тоқтауына 9-8 башмактың арасында тас тұрып қалғаны анықталған.
Екінші оқиға мамыр айында болған. Түлкібас-Арыс учаскесіндегі Састөбе станциясында №2214 пойызын үшінші жолдан жібергеннен кейін басты жолда Р-80 типті Альстом бұрма бағыттамасы жағдайды бақылауға мүмкіндік бермеген. Орын алған кемшілік тез арада жойылып, ретке келтірілді. Салдарынан екі бірдей пойыз 13 минутқа, тағы бір пойыз 7 минутқа кешігіп, жолда тұрып қалды. Болған ақауды анықтай келе башмактың дер кезінде тазаланып, майланбағаны белгілі болды.
Үшінші жағдай 7 маусым күні Түлкібас-Шымкент учаскесінде болған. Шымкент станциясында қолдан бұрылатын №23 бағыттама кіреберістегі минуста тұрған жағдайды бақылауға мүмкіндік бермеген. 3290 шақырымдағы 5 пикетте №3501 пойызы – ВЛ80С-2300 электровозы тоқтатылды. Мұнда себепті анықтай келе, башмакқа құм толып қалғаны белгілі болды.
Төртінші жағдай 29 шілде күні Арыс-Түлкібас учаскесіндегі Қорғасын станциясында «Р-80 Альстом» бағыттамасы оң жағдайды бақылап тұратын хабарды бермеген. Салдарынан кіреберісте №2870 пойызы, ВЛ-80С-1158 тоқтатылды.
Сондай-ақ, осы күні №34 «Ақтөбе-Алматы» жолаушылар пойызы, ВЛ-80С-2566 электровозы да тоқтатылады. 3278 шақырымдағы 7 пикеттегі орын алған ақау жөнделіп, жарты сағаттан кейін пойыз сапарын жалғастырды. Мұнда да пойыздардың тоқтауына башмактардың ақауы себеп болған. Жолшылар тез арада орын алған ақауларды ретке келтіріп, қозғалысты әрі қарай қамтамасыз еткен.
Бұдан бөлек, Шымкент станциясында №3/5 бұрма бағыттама секциясында жалған қызыл түс жанып, белгі берген. Салдарынан станциядағы екінші жолда №2210 пойызының электровозы аялдап, уақыт жоғалтқан. Ал 4-ші жолда 2212 пойызы, 0039 электровозы тоқтаған. Олардың тоқтауына оң жақтағы М-9 екі рельстің қосылған жеріндегі берілген белгі себеп болған. Орын алған кемшілікті жолшылар тез арада реттеп шықты.
Маусым айында да Қорғасын станциясында бұрма бағыттамасыз учаскеде таблоның пульті бос тұрған жоқ деген жалған белгі көрсеткен. Мұнда да кіреберістегі пойыздар тоқтатылды. №2305 пойызы 7 минут аялдаса, №2301 және №1273 пойыздары 1 минут кідірді. Пойыздардың тоқтауына сол жақтағы рельстердің түйіскен жердегі бағдаршамының белгі беруі себеп болған.
Мамандар қозғалысқа қауіп төндірмес үшін тозығы жеткен бағдаршамдарды қалпына келтірді.