Көмір 62% жеткізілген
Абай облысы бойынша меншікті тілші
Семей ЖТ бөлімшесі бойынша көмір тасымалы маусымы қыза түсті. Осыған дейін теміржолшылар аймақ көлеміндегі іргелі жылу электр орталықтарын қажетті қормен толықтай қамтамасыз етсе, қазіргі таңда жекелеген жылу көздерін, тұрғындар үшін тұйық желілерді отынмен қажетті көлемде қамтуда.
Семей ЖТ бөлімшесінің логистика және жүк тасымалы бөлімі мамандарының пікірінше, шығыстағы теміржолшылар қауымы облыстағы ЖЭО мен жылу көздерінде 342 мың тонна немесе 165% эксплуатациялық қор әзірлеген. Жеткізу келісім-шартқа сәйкес жүргізілуде. Бюджеттік ұйымдарға көмірді жеткізу шілде айында басталды. Жалпы қажеттілік қоры – 132,1 мың тонна. Қазіргі уақытта 85 мың тонна немесе қажетті отынның жалпы 62 пайызы жеткізілген.
Тұрғындарды жылыту маусымында көмірмен қамтамасыз ету үшін облыс бойынша 1123,6 мың тонна қатты отын қажет болады екен. Бұл ретте теміржолшылар жоспарлы шараларды мерзімінен кешіктірмей орындауда. Соның нәтижесінде бүгінгі күндері облыс бойынша 695,8 мың тонна көмір немесе жоғарыда айтқандай 62% жеткізіліпті.
Дәл қазіргі күнгі деректерге сүйенсек, аймақ көлеміндегі теміржол тұйықтарында жалпы көлемі 38,3 мың тонна көмір бар екен. Ал, Қаражыра кенішінен тәулігіне ең кемі 280 вагонға көмір тиеп жөнелтілуде. Негізінен 6 200 тонналық ауыр салмақты пойыздар құрастырылады. Аймақта күздің салқыны сезілгендіктен тұрғындар қазіргі күні жаппай көмір сатып ала бастады. Тұйық желілерде кезек сезілуде. Осы орайда семейлік теміржолшылар алдағы қыркүйек айынан бастап тиелетін көмір көлемін арттыруды жоспарлап отыр.