Вокзалдағы қонақ үйлер ашылды
Ақтөбе облысы бойынша меншікті тілші
Елде эпидемиологиялық жағдайдың тұрақтануына байланысты санитар мамандар бірқатар мекемелердің жұмысын қайта жалғастыруына рұқсат берді. Олардың қатарында теміржол вокзалындағы қонақ үйлер де бар.
Енді вокзалдағы қонақ үйлер, арнайы демалыс бөлмелері санитарлық талаптарды қатаң сақтап, жолаушыларды қабылдай алады. Ақтөбе теміржол вокзалындағы 15 демалыс бөлмесі әлеуметтік қашықтықты сақтай отырып, кешеден бері жұмыс істеуді бастады. Жеңілдетілген карантинмен вокзал ішіндегі қонақ үйлердің жұмыс жасауына рұқсат берілген.
«Елдегі төтенше жағдай жарияланғаннан бастап, індеттің таралу қаупін болдырмау үшін вокзал ішіндегі қонақ үй мен асхана жұмысы уақытша тоқтатылған болатын. Қазір ауру көрсеткішінің төмендеуіне байланысты жұмыс қайта жалғасты. Сыйымдылықты 50 пайыздан асырмай жұмыс істейді. Барлық жерге антисептиктер қойылды», – дейді Ақтөбе теміржол вокзалының басшысы Тойбазар Қуанышев.
Сонымен қатар, Ақтөбе теміржол вокзалының қашықтықтан жұмыс істеу тәртібіне көшірілген қызметкерлердің бәрі толық жұмысқа қосылды. Әртүрлі қызметтегі вокзалдың 75 жұмысшысы қазір қысқа дайындық жұмыстарына кірісіп кетті. Вокзал қызметкерлері бетпердемен жүру тәртібін сақтап, қорғаныш құралдарымен қамтамасыз етілген.
Бүгінгі күні өңірде кесте бойынша №57-58 «Орал – Нұр-Сұлтан – Нұрлы жол», №613-614 «Ақтөбе – Орал», «Орал – Ақтөбе» және №69-91 «Ақтөбе – Шалқар» бағытындағы пойыздар жүріп тұр. Барлық сақтық шаралары сақталған.