Алғашқы "десанттар" аттанды

Қазіргі заман талабына сай өндірісті цифрландыру жобалары барлық салада қолға алынып, жүзеге асырыла бастады. Солардың бірі – батыс өңірдегі «Пойыздар қозғалысын басқару орталығы» жобасы. Орталық Ақтөбе қаласында болады және ол Ақтөбе, Атырау, Маңғыстау, Орал, Қызылорда бөлімшелерінің диспетчерлік орталықтарын біріктіреді.

Әзірге бұл батыс өңірде құрылып отыр, ал алға қарай республиканың барлық өңірлерін қамтитын осындай басқару орталықтары болмақ. 

Бұрын пойыздар қозғалысын басқару, жолдардағы бағдаршамдарды реттеу, бұрмаларды ауыстыру, жолдардың бос болу-болмауын қадағалау сынды жұмыстар өңірлердегі пойыз диспетчерлерімен жүзеге асырылып келгені белгілі. Оның өзіндік қиындықтары да болды. Ал, жаңа жүйе бойынша станцияларда микропроцессорлық диспетчерлік орталық (МПДО) қондырылып, ол пойыздар қозғалысын автоматты түрде қадағалауға мүмкіндік береді. Жоғарыда аталған бес облыстағы пойыздар қозғалысы бір орталықтан басқарылады. 

Жуырда ашылған орталық жұмысын бастағалы да көп уақыт өте қойған жоқ. Оған барлық өңірлердегі пойыз диспетчерлері жұмысқа шақырылды. 

Қазақстан темір жолы үшін тарихи оқиға деп бағаланып отырған жаңа жобамен танысуға жуырда «ҚТЖ» ҰК» АҚ Басқарма төрағасының корпоративтік мәселелер және HR жөніндегі орынбасары Серік Әбденов бастаған делегация Ақтөбеде арнайы болып, Пойыздар қозғалысын басқару орталығы ғимаратының, пойыз диспетчерлері жұмыс орындарының даярлығымен танысқаны жайлы жазылған болатын. 

Міне, өткен жексенбі күні Атыраудан алғашқы 8 маман Ақтөбеге аттанды. 

Диспетчерлерді Атырау жүк тасымалы мен магистральдық желі бөлімшесі басшылық құрамы және кадр бөлімі мамандары оларға сәт-сапар және жаңа орында табыс тілеп шығарып салды. 

Атырау жүк тасымалы мамандар бөлімінің басшысы Еркебұлан Бержановтың айтуынша, Ақтөбеге жұмысқа шақырылған мамандар арнайы статусқа ие болады, яғни оларға барлық жағдай жасалады. Ең алдымен арнайы еңбекақы тағайындалады. 

Жалдамалы пәтермен қамтамасыз етіледі. Әр отбасы мүшелеріне айлықтың 25 пайызы төленеді, балаларын мектепке не балабақшаға, жұбайларын жұмысқа орналастыруға мүмкіндік жасалады. 

Жалпы, Қазақстан теміржолы бұл жобадан үлкен үміт күтіп отыр. 

Мамандардың айтуынша, оның жұмыс процесін жақсартуға септігі зор болмақ.