1 шілдеден бастап Ashyq қосымшасы Атырау темір жол вокзалында іске қосылады
Атырау облысы бойынша меншікті тілші
1 шілдеден бастап Атырау темір жол вокзалы жолаушыларға «Ashyq» қосымшасы арқылы қызмет көрсетуді бастайды. Оған дайындық жұмыстары алдын ала жүргізіліп, бүгінде нысан жолаушыларды қабылдауға дайын. Нысанның кіреберісінде 6 QR-код орналастырылған. Соған сәйкес, вокзалға кірер кезде жолаушы «Ashyq» қосымшасы арқылы QR-кодты сканерлеуі қажет. Келушілер смарт- фондар арқылы өздерінің мәртебесін анықтай алады. Егер ұялы телефонда «Ashyq» қосымшасы болмаса, Kaspi.kz, Halyk, Homebank, Aitu қосымшаларын пайдалануға болады. «Қызыл» және «сары» түсті мәртебесі бар азаматтар вокзалға жіберілмейді. Сонымен қатар, азаматтардың жеке сәйкестендіру нөмірі арқылы да мәртебені анықтауға мүмкіндік бар. Егер мобильді қосымшасы немесе смартфоны болмаған жағдайда, кіреберісте вокзал кешенінің қызметкеріне жеке сәйкестендіру нөмірін көрсетсе жеткілікті. Сол секілді шетел азаматтары да паспорт нөмірін көрсету арқылы өте алады. – Коронавирустық инфекцияның таралу қаупін азайту мақсатында 1 шілдеден республикалық дәрежесі бар Атырау вокзалы кешенінде «Ashyq» жобасы енгізіледі. Бұл жұмыстар «Атамекен» кәсіпкерлер палатасымен бірлесе орындалып, олар өз тарапынан жобаны енгізуге және алгоритмін түзуге көмек берді. Бұған дейін вокзал ішінде осы туралы бейне хабарламалар іліп, халықты құлағдар етуді мақсат еттік. Кіреберісте жобаны пай- далану туралы барлық ақпарат толықтай көрсетілген. Оған қоса, вокзал қызметкерлері жолаушыларға жөн сілтеп, қызмет көрсетеді. Жолаушылар кептелісі болмас үшін 6 QR-код орнатып отырмыз және ЖСН арқылы өтуге де мүмкіндік бар. Осы қызметтерді атқару үшін вокзал қызметкерлерімен қоса тағы 5 адам қалалық жұмыспен қамту орталығынан бөлінді, – дейді Атырау магистральдық желі бөлімшесі вокзал шаруашылығы бөлімінің бастығы Айбек Қуанышев. Айта кетерлігі, қазір Атыраудан елордаға және Алматы, Ақтөбе, Маңғыстау бағыттарында пойыздар қатынайды.