Шымкентте студенттер теміржол ардагерлерімен кездесті
Шымкент қаласы бойынша меншікті тілшісі
Жуырда Шымкент көлік колледжінде «Өткеніңді білмей, келешегіңді болжай алмайсың» атты танымдық тәрбие сағаты өтті. Оған аймақтағы теміржолшы ардагерлер арнайы шақырылды.
Оқу орнының басшылығы мен студенттер қауымы Нұрғали Нұртаев, Майра Омарқызы, Сади Махамбетұлы, Құлахмет Темірбеков, Назира Құрманбекова, т.б. ардагерлерді қарсы алып, аймақ теміржолының кешегі-бүгінгі тарихынан тағлымды әңгімелерін тыңдады. Аға буын теміржолшылар қазақ теміржолын көтеруге атсалысқан тұлғалар жайлы естеліктерімен бөлісіп, олардың еңбектері мен салаға сіңірген үлесін жастарға үлгі етті.
Шымкент теміржолынан 1958-1990 жылдар аралығында төрт бірдей Социалистік Еңбек Ері шыққан. Бөлімшені әр жылдары басқарған Сырлыбек Байжанов, Көпжан Мұхаметжанов, Әуесхан Салықбаев сынды майталмандармен қатар Арыс станциясының пойыз құрас- тырушысы Әбдуәлі Балғынбеков те Еңбек Ері атанған.
Жиында колледж студенттеріне сала ардагерінің өмірдеректері туралы слайд көрсетіліп, жастар аға буынға өздерін қызықтырған кез келген сауалды қойып, жауабын алды. Ал ардагерлердің, әрине, болашақ теміржолшыларға айтары аз емес екен, дөңгелек үстел басына жиналған қос буын өкілдері тамаша тағлымды басқосу өткізді.