Ақтөбелік теміржолшылар 98 жастағы тыл ардагерін Жеңіс мерекесімен құттықтады
Ақтобе облысы бойынша меншікті тілшісі
«ҚТЖ-ЖТ» ЖШС «Батыс» аймақтық филиалының басшысы Бөріхан Беркімбаев тыл ардагері Дәметкен Әлмұратованы Ұлы Жеңіс күнімен құттықтады. Сұрапыл соғыс жылдары теміржолда еңбек еткен кейуана бүгінде 98 жаста.
Сұм соғыс басталғанда 17 жастағы өрімдей қыз оқуын тастап, соғысқа кеткен әкесінің орнына Шалқар станциясына жол бұрушы болып жұмысқа кіреді. Уақыт өте әке жолы бүтін бір ұрпағының ата кәсібіне айналды.
"Біз жұмыс талғаған жоқпыз. Соғыс кезінде ертелі-кештегі өмірімізді шойын жолдың бойында, қара жұмыс атқарумен өткіздік. Рельс-шпал ауыстыру, ауыр лом, зілдей балға, темір-терсектен бастап, көмірді арқалап жүріп таситын едік. Ал түнімен тағы ұйықтамай соғыстағы солдаттар үшін киім тоқимыз. Кезекшілікте май шаммен отырып тоқыған шұлық, қолғаптардың есебі жоқ", – дейді Дәметкен Әлмұратова.
Тыл еңбеккерін арнайы құттықтай барған Бөріхан Сматуллаұлы ардагердің құшағын гүлге толтырып, ақшалай сыйлық және азық-түлік себетін тарту етті. Дәметкен апа бұрынғыдай емес, құлағы ауыр естиді. Бірақ ойы жүйелі, жады сол қалпында. Сонау тарих қойнауында қалған үрейлі соғыс жылдарын, радиодан «Жеңіс» хабарын естігенде теміржол бойында сүйінші сұрап жүгіргенін көзіне жас алып отырып айтып берді.
Соғыстан кейін Қазалы қаласындағы техникалық мектепті тәмамдап, станция кезекшісі болған Дәметкен апа Шалқар ауданындағы №62 Тобылғысай разъезінде 1974 жылға дейін еңбек етіп, көпбалалы ана ретінде 50 жасында еңбек демалысына шыққан. Қарт ананың ұлдары да теміржолшы болып, қазір зейнет жасына шығып отыр.
