Ақтөбеде теміржолшылар оқушыларға қауіпсіздік ережелерін түсіндірді

Атырау темір жолында арнайы жаяу жүргіншілер өтетін бірнеше аспалы көпір бар. Соның бірі қала орталығындағы Ақжайық станциясында орналасқан. Бұл көпірдің қала тұрғындары үшін маңызы ерекше.

Өйткені Атырау жол бөлімшесі маңындағы үйлер мен темір жолдың арғы бетіндегі Химпоселок ауылы тұрғындары үшін көпір – күнделікті жұмысқа, оқуға, басқа да шаруаларына барар қатынас жолы, оларға автобуспен бүкіл қаланы айналып өту тиімсіз. Жаяу да болса осы көпір арқылы, төтесінен өте шыққан әлдеқайда тез. Бірақ, қаншама ескерту берілсе де пойыз астынан өтуге болмайтынын, өмірге қауіпті екенін түсінбейтін жүргіншілер жетерлік. Соның ішінде әсіресе, жасөспірім балалар белгіленбеген жерден өту адам өміріне аса қауіпті екенін ескере бермейді.

Осыған орай жуырда станция қызметкерлері мен желілік полиция қызметкерлері Химпоселок ықшам ауданындағы М.Әуезов атындағы №7 мектеп оқушыларымен кездесіп, «Темір жол – қауіпті аймақ» тақырыбында дәріс оқып, қауіпсіздік жөнінде мәліметтермен таныстырды. Жиынға 4-9 сынып аралығындағы 220 оқушы қатысты. Мамандар жасөспірімдерге көрнекі плакаттар, бейне түсірілімдер арқылы қауіпсіздік ережелерін сақтауды үйретті. Көпірмен өтудің маңыздылығын, пойыздың астымен өту адам өміріне аса қауіпті екендігін ұғындырды. Мұның бәрі алдымен қауіпсіздік үшін қажет, станция бойында маневрлік жұмыстар жүреді, күндіз-түні пойыз қозғалысы толастамайды. Соған қарамастан көпірден өтпей, кейбір тұрғындардың және балалардың рельстен тура пойыз астымен өтіп шығам деуге болмайтынын түсіндірді.