Еңбек жағдайына ерекше көңіл бөлінеді

«Қазкөліккәсіп» ҚБ «Астана» торабына қарасты Қырқыншы машиналандырылған жол дистанциясындағы бастапқы кәсіподақ ұйымы былтыр Еңбек қауіпсіздігі және қорғау бойынша салалық байқауда үздіктер қатарынан табылған. Оразалы Ерубаев төрағалық ететін ұйымға кәсіподақ жұмысын ілгері бастыруға қосқан үлесі үшін осы саладағы арнайы байқауда бірінші орын мен ақшалай сыйлық берілген болатын.

Кәсіподақ жұмысы оңай емес, тынымсыз да мазасыз қызмет. Олар теміржолшылар құқының қорғалуын қамтамасыз етіп, еңбек тәртібінің бұзылмауын қадағалау барысында талай кедергілерге тап болады. Сол кедергілерді жеңе отырып, қиын жағдайға түскен жұмысшыларға қолдау көрсетіп, олардың құқығын қорғау – қызығынан шыжығы көп тірлік. Сонымен қатар түрлі қайырымдылық шараларын, спорттық додалар ұйымдастыру да кәсіподақ жұмысының бір қыры. Кәсіподақ жұмысы уақытылы есеп беріп отыруды да қажет етеді. Міне, осы бағытта аталған бастапқы кәсіподақ ұйымы өте белсенді деп танылған. Мәселен, былтыр үйлері өртеніп кеткен машинист пен көмекші машинистке дистанция кәсіподағынан бөлек Астана торабынан да қомақты материалдық көмек көрсетіліп, олардың суық түспей үйлерін қалпына келтіруіне бүкіл ұжым атсалысты деуге болады.  

Теміржолшылар әулетінің өкілі Оразалы Ерубаев еңбек жолын 2001 жылы жол шаруашылығында кадр бөлімінде бастаған. Құқықтық салада білімі бар, сауатты маман 2010 жылы кәсіподақ төрағалығына сайланған. Содан бергі 12 жылда сала кәсіподағының қыр-сырын меңгеріп, ұжымның нағыз тірегіне айналды.  

– Біздің кәсіподаққа дистанцияның 600-ге жуық қызметкері мүше. Кәсіподақ жұмысымен тікелей айналысатын 6 адам бар, еліміздің және теміржолдың өміріндегі жаңалықтардан біз де тыс қалмай, барлық іс-шараларға қатысып келеміз. Биыл, мысалы, екі жылдан бері тоқтап қалған балалар лагерін ұйымдастыру, түрлі емдеу-сауықтыру орындарына жолдама беру, әлеуметтік аз қамтылған және қиын жағдайға тап болған отбасыларға материалдық көмек көрсету сынды жұмыстар жүргізілді. Сонымен қатар Білім күні қарсаңында «Мектепке жол» акциясына қатысып, балалары бірінші сыныпқа барған әріптестерімізге қол ұшын создық, – дейді кәсіподақ төрағасы.  

«ҚТЖ» ҰК» АҚ мен еңбек ұжымдары арасындағы Ұжымдық келісімшарттағы талаптар мен міндеттер негізінде жұмыс істейтін дистанцияда еңбек жағдайына ерекше көңіл бөлінеді. Өткен жылы еңбек қорғау саласында кемшіліктерге жол берілген жоқ, қызметкерлер толықтай жұмыс киімдерімен қамтамасыз етілген. Кәсіподақ қаржысымен жұмысшылар пайдалануындағы 23 вагон қажетті техникамен, кондиционер, тоңазытқыш, қысқатолқынды пеш, электр шәйнектерімен жабдықталды. Кәсіподақ ұйымы қызметкерлердің салауатты өмір салтын ұстануына барынша қолдау жасайды. Осы мақсатта футбол мен волейбол ойнауға арналған спорт алаңы салынып, үстел теннисіне арнайы бөлме жабдықталған.