Атырау өңірінде балалар ертеңгілігі өтті
Атырау облысы бойынша меншікті тілші
Атырау облысының барлық аймағында теміржолшылардың балаларына арналған жаңажылдық шаралар ұйымдастырылды, деп хабарлайды Rail-news.kz.
Жаңа жылды ересектерге қарағанда балалар қауымы ғажайып мереке санайды. Барлығы аяз ата мен ақшақарды күтіп, олардың қолындағы сыйлық толы қапшықты қарайлайды. Ол үшін өлең, тақпақтарын алдын ала жаттап, дайындық жасайды. Кішкентай балалар жаңа жылды барынша көңілді, қызықты өткізгісі келеді.
Бала көңіліннен шығу үшін жаңа жылдық балалар ертеңгілігін ұйымдастыруда өңір теміржолшылары барын салды деуге болады. Атырау жүк тасымалы бөлімшесіне қарасты Атырау қаласы мен Мақат, Құлсары аудандарында, станцияларда, басқа да теміржол мекемелерінде періште көңілді сәбилердің көңілінен шығатын ойын, концерттік бағдарламалар, әр түрлі ертегілер мен ғажайып қойылымдар көрсетілді.
Шыршаны айнала ән айтылып, би биленді. Өнер көрсеткен балаларға Аяз Ата қоржынынан мол сыйлықтар берілді. Мерекелік шара барысында барлығы 1744 бала қамтылды.
