Пойызда ішімдік ішу тыйылмай тұр
Маңғыстау облысы бойынша меншікті тілші
Жыл басынан бері Сай-Өтес станциясының маңында 4 жолаушы пойыздан түсіріліп, әкімшілік шараға тартылған. Басты себеп ол азаматтардың ішімдік ішіп, масаң күйде қоғамдық тәртіпті өрескел бұзып, жолаушылардың тыныштығын алуы болып отыр.
Өкінішке орай соңғы кезде осындай жағдайлар көбейіп кетті. Ондай жайттардың алдын алмаса, соңы түрлі бұзақылықтар мен адам өміріне қауіп төндіретін дәрежедегі қылмысқа, орны толмас өкінішке ұласуы мүмкін деп дабыл қаққан сайөтестік желілік полиция өкілдері жуырда перронда сауда жасайтын кәсіпкерлермен кездесті. Оларға пойыздағы жолаушыларға алкоголь өнімдерін сатуға тыйым салынатыны, бұл үшін қандай жауапкершілікке тартылып, қанша айып төлейтіні туралы түсінік берді.
– Жолаушылар пойыздарында болатын құқық бұзушылықтардың басым бөлігі азаматтардың алкогольдік өнімді тұтынуы салдарынан орын алады. Атап айтсақ, жыл басынан бері Сай-Өтес станциясындағы желілік полиция бөлімшесінің қызметкерлері тарапынан 4 азамат ҚР ӘҚБтК-нің 440-бабына сәйкес қоғамдық орында алкогольдік ішімдік ішіп жұрттың мазасын алу, адамдардың қадір-қасиетін қорлайтындай әрекеттері үшін пойыздан түсіріліп, тиісті шара қолданылды. Осындай деректердің алдын алу мақсатында Сай-Өтес ауылының әкімі С.Абдиевті де шақырып, әкімшілік өкілдерімен бірлесе станциядағы теміржол вокзалы маңында сауда-саттықпен айналысатын азаматтармен дөңгелек үстел өткіздік. Онда біз қолданыстағы заңнама талаптарын сақтай отырып, лицензиялары болмаса алкогольдік өнімдерді сатуға қатаң тыйым салынатынын, 21 жасқа дейінгі жастарға сатқан жағдайда қатаң әкімшілік жазаға тартылатындығы туралы ескерттік. Бір ғана ішімдіктің салдарынан жолаушылар пойызындағы қаншама адам зиян шегетінін мүмкіндігінше жеткізуге тырыстық, ең бастысы қоғамдық тәртіп бұзылмауы керек,– дейді Сай-Өтес станциясындағы желілік полиция бөлімшесінің бастығы Н.Рахметов.