Пойыздың терезесіне тас лақтыру тиылмай тұр
"Қазақстан теміржолшысы" газетінің Жамбыл облысындағы меншікті тілшісі
Жақында Тараз вокзалына келіп тоқтаған жолаушылар пойызына белгісіз біреулер тас лақтырып, терезесін сындырған факті тіркелген болатын. Желілік полиция бұзақыны анықтады.
«Қызылорда-Семей» бағытындағы жолаушылар пойызының вагонына тас лақтырған кәмелеттік жасқа толмаған «С» есімді жасөспірім небәрі 11 жаста екен.
Тараз станциясындағы Желілік полиция бөлімінің әкімшілік полиция бөлімшесінің қызметкерлері жедел іздестіру іс-шараларын жүргізуі нәтижесінде тас лақтырған баланың Тараз қаласы Абай көшесіндегі 476-үйде тұратынын, 6-сыныпты бітіргенін анықтаған. Жеткіншек өз кінәсін мойындады.
Полиция қызметкерлері жасөспірімнің анасына кәмелет жасқа толмаған баласын тәрбиелеу жөніндегі міндеттерін дұрыс орындамағаны үшін, ҚР Әкімшілік құқық бұзушылық туралы Кодексінің 127-бабы 3-бөлігі бойынша әкімшілік хаттама толтырды. Іс-құжаттар Жамбыл облысы кәмелетке толмағандар істері жөніндегі мамандандырылған ауданаралық сотқа жолданды.
Жамбыл облысы кәмелетке толмағандар істері жөніндегі мамандандырылған ауданаралық сотының қаулысымен жасөспірімнің анасы кінәлі деп танылып, оған 20 айлық есептік көрсеткіш, яғни 73 840 теңге көлемінде айыппұл салынды.