Теміржолшылар мемлекеттік тілден тест тапсырды
«Қазақстан теміржолшысы» газетінің тілшісі
«ҚТЖ» ҰК» АҚ Орталық аппаратының 500-ден астам қызметкері мемлекеттік тіл білуі бойынша «Қазтест» сынағынан өтті.
ҚР Үкіметінің 2023 жылғы 16 қазандағы № 914 қаулысымен бекітілген ҚР тіл саясатын дамытудың 2023-2029 жылдарға арналған тұжырымдамасында «Қазтест» жүйесі бойынша айқындалатын мемлекеттік тілді В1 деңгейінде меңгерген ұлттық компаниялар қызметкерлерінің үлесі 2024 жылы 38% құрауы тиіс екені көрсетілген. Осыған орай №912-ЦЗ бұйрығымен бекітілген іс-шаралар жоспарының 12-тармағына сәйкес «ҚТЖ» ҰК» АҚ қызметкерлері үшін «Қазтест» бағдарламасы негізінде қазақ тілін білу деңгейін анықтау бойынша диагностикалық тестілеу ұйымдастырылып, өткізілуде.
Компанияның мемлекеттік тілді дамыту секторының меңгерушісі Ербол Тоқтағазының айтуынша, биыл жоспарда бүкіл өңірлерді қамти отырып, жалпы 3000 астам ҚТЖ қызметкерін диагностикалық тестілеу көзделіп отыр. Биыл бұл тестті Семей, Жамбыл, Ақтөбе, Қарағанды, Алматы, Жетісу, Қостанай, Атырау өңірлерінің теміржолшылары 8 сәуір мен 30 мамыр аралығында сол облыстардың оқу орындарында тапсырды. Одан кейін Маңғыстау және басқа да өңірлердің теміржолшылары мемлекеттік тілден тест сынақтарынан өтті. Енді міне маусымның аяғында компанияның Орталық аппарат қызметкерлері де осы тест тапсыруға қатысты.