Дегелең станциясының ұжымы қайырымдылық акциясын бастады
Абай облысы бойынша меншікті тілші
Семей локомотив пайдалану депосы биылғы Қазақстан темір жолының 120 жылдық мерейтойымен қатар өздерінің 110 жылдығын атап өтуде.
Осыған орай, Дегелең станциясындағы ТД-18 айналым депосының ұжымы жуырда «10 қайырымдылық шарасы» атты акциясын бастады. Алдымен сала ардагерлеріне көмекке келді. Локомотив бригадалары депо ардагері Жұматай Қаңлыбаевтың үйіне барып шаруашылық жұмыстарына қол ұшын берді.
Айналым депосының машинист нұсқаушысы, қоғам белсендісі Қазбек Смағұлов бастаған локомотившілер бас-аяғы бірнеше сағаттың ішінде ақсақалдың ауласындағы қаулап өскен арамшөп пен бұталарды тазартып, қора-қопсысын жөндеп, бақшасын да ретке келтіріп берді.
Бүкіл ғұмырын Семей теміржолының локомотив шаруашылығына арнаған Жұматай Әбдіғалиұлы бүгінгі әріптестерінің, өскелең жас буынның ұмытпай, хал сұрай келіп, көмек көрсеткеніне қуанып қалды.
– Зейнеткерлер ешқашан назарымыздан тыс қалған емес. Олардың барлығы локомотив шаруашылығында елеулі жылдар еңбек өтілі бар құрметті жандар. Біз үшін өнегенің көзі. Сондықтан тек бір реттік акциямен немесе қарттар күнінде ғана емес, жыл он екі ай бойы жәрдем көрсету – міндетіміз, – дейді бұл орайда пікір білдірген Семей локомотив пайдалану депосының кәсіподақ ұйымы төрағасы Серік Дүйсенбаев.