Маңғыстаулық теміржолшылар ардагерлерге мерекелік көңіл-күй сыйлады
Маңғыстау облысы бойынша меншікті тілші
Түбек теміржолының зейнеткерлері мен ардагерлері Маңғыстау станциясындағы мейрамханалардың бірінде кездесті. Кездесу кешін сала кәсіподағы қарттар күніне орай ұйымдастырды.
Мейрамханадағы мерекелік дастархан басында сала зейнеткерлері көңілді кешті тамашалап, өздеріне арнайы дайындалған ас-тағамдардан дәм татты. Еңбек жолдарын еске түсіріп, көптен көріспеген дос-жарандарымен дидарласып, көңілдері көтеріліп қалды.
Маңғыстау жүк тасымалы бөлімшесі директоры Нажімедин Ғұбашов пен Маңғыстау магистральдық желі бөлімшесі директорының міндетін атқарушы Ерназар Ізтұрғанов, сала кәсіподағының өңірдегі өкілі Сәрсенбай Есенқұлов және басқа да басшылар ізгі тілектерін айтып, құттықтады.
Салтанатты шара одан әрі қарай өнерлі теміржолшылар дайындаған мерекелік шараға ұласты. Ән айтылып, домбыра тартылды. Би билеп, ардагерлер мәз-мейрам болды.
– Аталған мерекелік шараға осы жақын маңда тұратын екі жүзден астам зейнеткер келді. Олар кезінде жүк тасымалы және магистральдық желі бөлімшелерінде еңбек етіп, түбек теміржолының дамуына атсалысқан азаматтар. Бұл кісілердің еңбегі ешқашан ұмытылмайды, – дейді Орталық теміржолшылар кәсіби одағының өңірдегі өкілі Сәрсенбай Есенқұлов.
