Қандыағаш спортшылары кезекті спорттық ойындарды Тұңғыш Президент күніне арнады
Тұңғыш Президент күніне орай Ақтөбе теміржолшылары Қандыағаш станциясындағы спорт алаңында кезекті рет бас қосты. Локомотив шаруашылығы, вагон қараушылар, электромонтерлар мен байланысшылар командалары волейбол мен үстел теннисінен бақ сынасты.
– Спорттық ойындар Тұңғыш Президент күніне орайластырылып отыр. Волейбол ойындарынан локомотив шаруашылығының бригадалары топ жарса, вагон депосының жұмысшылары екінші орынды иеленді. Электрмен жабдықтау дистанциясының жігіттері де намысты қолдан бермеуге тырысты, олар үшінші орынға жайғасты», – дейді Ақтөбе магистральдық желі бөлімшесінің спорт жөніндегі нұсқаушысы Нұргүл Батырхан.
Жекелеген ойыншыларды бөліп айтар болсақ, үстел теннисінен локомотив пайдалану депосының өкілі Досым Жұмағұлов қарсылас шақ келтірмесе, оның әріптесі Ғалымжан Құрманбаев ұпай санынан сәл ғана артта қалды. Алғашқы үштікке белгі беру және байланыс дистанциясының жұмысшысы Айдын Нұрдәулетов та ілікті.
Бекбол Құлдан, Ақтөбе