16 станцияны аралаған "Денсаулық" дәрігерлік пойызы тұрғындардан алғыс арқалап қайтты
«Денсаулық» мамандандырылған профилактикалық сауықтыру пойызы Алматы облысын аралап, 21 күн ішінде 16 станция мен разъезге ат шалдырды. Дөңгелекті емхананың соңғы аялдамасы Алтынкөл станциясы болды. Таңертеңнен бері қабылдауға кіріскен жылжымалы емхана қызметіне жүгінген тек Алтынкөл станциясы тұрғындары ғана емес, жақын маңда орналасқан Пиджим, Лавар кенттерінің де тұрғындары келіп, кезекке тұрып жатты.
«Дөңгелек үстіндегі емхана» осы жиырма күннен астам уақыт ішінде алты мыңнан астам адамды қабылдаған, бір адам орташа алғанда үш маманға қаралған. 300-ден астам лабораториялық тексеру мен диагностикалық рәсімдер кешені жүргізілген. «Денсаулық» пойызының жолға шығуы – игілікті іс, теміржолшылар мен олардың отбасыларына үлкен әлеуметтік маңызы бар, өйткені бұл пойыздың ерекшелігі медицина саласындағы заманауи кешенді технологиялардың арқасында дәрігерлік кеңестер мен білікті көмек беру болып табылады.
– Қолда бар мобильді база білікті медициналық көмек көрсетуге қабілетті. Осы күнге дейін 6786 адам қабылданып, 486 адамнан қант диабеті, гайморит, іріңді отит сынды аурулар, үш пациенттен туберкулез анықталған, липоманы жою, фурункулды ашу сияқты кішігірім хирургиялық оталар жасалды, – деп мәліметпен бөлісті медициналық бригаданың бас дәрігері Арман Тулахбаев.
Мамандардың айтуынша, тексеру кезінде теміржолшыларда анықталған жүректің гипертониялық және ишемиялық аурулары, қолайсыз климаттық аймақтарда анемияның белең алып тұрғаны алаңдаушылық туғызады.
Жергілікті жерлерде – офтальмолог, эндокринолог, невропатолог дәрігерлері, ал әйелдерде маммолог үлкен сұранысқа ие екені жасырын емес, ауылдық емханаларда маммолог түгілі, гинеколог жоқтың қасы. Бірінші тексерістен-ақ адамдардың көбі жүрек-қан тамырлары, ас қорыту жолы ауруларымен, қан қысымының күрт көтерілуімен зардап шегетіні анықталды. Сонымен қатар асқазан, бүйрек пен көз ауруларына шағымданғандар қатары көп болған. Анықталған науқастар әрі қарай ем алуға аудандық және облыстық ауруханаларға жолданыпты.
Медициналық бригаданың Алматы облысына сапары барысында оның жұмысына жергілікті халықтан еш шағым түскен жоқ, керісінше, алғыс арқалап қайтты.
– Алтынкөл – облыстағы соңғы нүкте. Енді республиканың басқа аймақтарына аттанып, миссиямызды әрі қарай жалғастырамыз, – деді пойыздың бас дәрігері.
Елена ҚОЛДАСБАЕВА,
Алматы облысы