Ақмола жүк тасымалы бөлімшесіндегі жылу орталықтарына 5,2 млн тонна көмір жеткізілді
Жыл басынан бері Ақмола жүк тасымалы бөлімшесі шекарасында орналасқан, яғни Астана, Петропавловск және Көкшетау қалаларындағы жылу электр орталықтарына 5,2 млн тоннадан жоғары көмір жеткізілген.
Ал осы айда 777 400,0 мың тонна көмір жеткізу жоспарланған. Бөлімше мамандары ұсынған деректерге сүйенсек, жылу маусымында жылу электр орталықтары қоймаларындағы көмір қоры Энергетика министрлігі бекіткен, 20 тәуліктік нормадан артық болып отыр. Халықты, әлеуметтік саладағы қазандықтарды көмірмен қамтамасыз ету межесі де үдесінен табылып отыр. Сондықтан көмір жетіспеушілігіне қатысты қауіп жоқ.
«Бұл әлеуметтік маңыздағы жүктердің тасымалын «ҚТЖ» ҰК» АҚ қарамағындағы теміржолшылар ұйымдастырып отыр. Қатты отынмен жедел қамтамасыз ету үшін «ҚТЖ-Жүк тасымалы» АҚ бастамасымен облыстық орталықтарда жергілікті атқарушы органдардың, көмір бассейндері өкілдерінің және де алдағы жылу маусымына аймақтағы энергетикалық кәсіпорындар мен халыққа көмір жеткізуге, сондай-ақ, тасымалды қамтамасыз етуге қызығушылық танытқан өзге де тараптардың қатысуымен көшпелі кеңес ұйымдастырылды. Әзірге көмір тасымалында ешқандай мәселе жоқ. Бәрі жоспарға сай орындалуда», – деп атап өтті Ақмола ЖТ бөлімшесі басшысы Н.Жаниязов.