Еріктілер жылы: игілік эстафетасы бастау алды
Қызылорда облысы бойынша меншікті тілші
ҚР Президенті Қасым-Жомарт Тоқаев 2020 жылды «Еріктілер жылы» деп жариялауына байланысты «ҚТЖ-Жүк тасымалы» АҚ басшылығы 2020 жылға «Игі істер эстафетасы» жобасын іске қосты.
Осыған орай Қазалы вагон пайдалану депосының бастығы Арғын Орымбаев Шиелі техникалық қызмет көрсету бекетінің теміржолшылары арасында болып, түсіндірме жұмыстарын жүргізді. «Еріктілік жастардың ғана ісі емес, титтей болсын жақсылық, игілік жасау арқылы оған әрқайсымыз үлес қоса аламыз. Жақсылық жасаудан жарысқан, қайырымдылықтан қалыспаған халықтың ұрпағымыз ғой, сондықтан елдік шараға үн қосайық» деді ұжым басшысы.
Шиелі техникалық қызмет көрсету бекетіндегі ұжымдастарымен жүргізілген жұмыстардың соңы бәрін «өзіңнен баста» қағидасына орайластырылып, вагон пайдалану депосының теміржолшылары бұл бастаманы бірауыздан қолдайтындарын жеткізді. Игілікті өздерінен бастауды ұйғарған вагоншылар мекеменің жұмыс бөлмелерінен басталған тазалық жұмысы мекеме ауласында жалғасын тапты. Жұмыстан тыс уақытта құрал-саймандарын алып өз жұмыс орындарын, мекеме аулаларын тазалап, таптұйнақтай етті.
– Қазалы вагон пайдалану депосы ұжымының жұмыстан тыс уақытын өз еріктерімен игілікті іске арнайтын жобасын бүгін осы Шиелі бекетінен бастап отырмыз, бұл алдағы уақытта барлық филиалда және әр қырынан жалғасын табатын болады, – деді Қазалы вагон пайдалану депосының бастығы Арғын Орымбаев.
Вагоншылар ұжымының теміржолшылары келесі кезекте қамқорлықты қажет ететін жандарға рухани-демеу тұрғыдан қайырымдылық, қолдау жасауды іске асырмақ.