Түрксібтің 90 жылдығына орай жоспарлы жұмыстар
Абай облысы бойынша меншікті тілші
Биылғы Түрксібтің тоқсан жылдығына орай ел шығысындағы Аягөз өңірінің теміржолшылары ғасыр құрылысына қатысты тарихты қайта түгендеуде. Бұл орайда кешегі даңқты сала қызметкерлері мен ерлікке толы күндерді кейінгі ұрпақ жадында қалдыру мақсатында жоспарлы жұмыстар жасалуда.
Әуелгі кезекте Аягөз теміржолын өркендетуде өнегелі ісімен танылған Құрметті теміржолшылардың есімін ұлықтап, қала ішінен көше беру туралы ұсыныс қабылданған болатын. Осы ретте Семей ЖТ бөлімшесінің ардагерлер кеңесінің Аягөз тораптық ұйымының төрағасы Серік Акишевтің күш салуымен соңында өшпес із қалдырған бес бірдей аягөздік теміржолшыларға көше атын беру туралы бастама көтерілді. Ұсынысты аудандық мәслихат депутаттары бірауыздан қолдап, бекіту үшін облыстық ономастика комитетіне жолдады.
– Қазіргі таңда Аягөз қаласы бойынша бес бірдей теміржолшының есіміне көше берілген. Әйтсе де, кеңес дәуірінен келе жатқан идеологиялық мәні жоқ көше атауларын ауыстырып, олардың орнына тағы да Түрксіб құрылысымен даңқы шыққан теміржолшылардың атын беру туралы ардагерлер қауымы бастама көтерген болатын. Қазіргі күні шешімін күтіп отырмыз. Мұның сыртында аягөздік Түрксіб құрылысшыларына мемориалдық тақта ашылмақ. Жоспарлы жұмыстар осылай жалғасып жатыр, – дейді Аягөз тораптық ардагерлер кеңесінің төрағасы Серік Жақияұлы.
Сонымен қатар, Аягөз локомотив пайдалану депосы жанынан ашылған салалық мұражай тың жәдігер, соны деректермен толығып қайта жаңғыруда екен. Себебі, мұнда Аягөз теміржолына қатысты жәдігерлер өңірдегі сала қызметкерлері мен ардагерлерден, жалпы қалалықтардан үзбей қабылданып келеді. Сол себептен де, мұражай қоры күн санап толыға түсуде.
Осыны ескерген ТЧЭ-25 басшылығы мен ардагерлер қауымы музей ішінен арнайы мүйістер ашып, экспозиция қатарын молайтыпты. Жалпы, Аягөз локомотив пайдалану депосының мұражайы күллі еліміз бойынша қазақ теміржолынан мол хабар беретін ең іргелі орын.
Биыл аталып өтетін Түрксібтің 90 жылдығына орай мұнда келушілер саны арта түседі деп күтілуде. Себебі, бұл музей ғасыр құрылысының барлық кезеңін тұтас қамтиды. Атап айтсақ, Түрксібтің даңқты құрылысшылары фотосуреттері мен сол дәуірдегі қолданылған тарихи теміржол аспаптары жақсы сақталған. Бір бұл емес, аймақ теміржолынан мол мағлұмат беретін байырғы мерзімдік басылымдар мен кітаптар, тарихи фотосуреттер де мұражай төрінен орын алған.
Аягөз бен Жарма әйгілі теміржол династияларымен даңқы шыққан өңірлер. Осы ретте, Шығыстағы шойынжолда еңбек өтілдері жүздеген жылдарды құрайтын атақты әулеттердің шежіресі бөлек тақырып.
– Мұражайға кірген адам бай тарихы бар Аягөз теміржолының кешегі мен бүгінгі тыныс-тірлігінен мол мағлұмат алады. Мерейтойға орай тарихи жәдігерлермен толығып жатқан мұражайды қайта жабдықтадық. Оған әсіресе жергілікті ардагерлер қауымы зор үлес қосып жатыр, – дейді директордың орынбасары Ихлас Ерденов.
Түрксібтің 90 жылдық мерейтой құрметіне бильярд пен шахматтан спорттық шаралар өткізу де көзделіп отыр екен.