Материялдық көмек - мұқтаж жандарға
Абай облысы бойынша меншікті тілші
Республикалық «Біз біргеміз!» акциясына аягөздік теміржолшылар да қалыс қалмады. Жергілікті сала мамандарының атсалысуымен жуырда аудан көлеміндегі аз қамтылған, жалғызбасты, тұрақты кіріс көзі жоқ, сондайақ, көпбалалы отбасылар мен теміржол саласы ардагерлеріне материалдық көмек көрсетілді.
Аталмыш бастамаға Аягөз станциясы бойынша тораптық ардагерлер кеңесі мен жергілікті мекемелердің кәсіподақ ұйымдары, іргелі теміржол кәсіпорындары зор үлес қосты. Айта кетерлігі, аудандық әкімдіктің ұсынысы бойынша қайырымдылық шаралары тек теміржолшылар қауымына ғана емес, қиын жағдайға тап болған барша аягөздіктерге көрсетілді.
20-дан аса отбасыға бір реттік жәрдем көрсетіліп, мұқтаж жандарға азық-түліктер мен көпреттік пайдалануға жарамды бетперделер табыс етілді. Алдағы уақыттарда мұндай шараларды жалғастыру көзделуде. –
Аягөз жол дистанциясы бойынша көпреттік медициналық бетперделер тігіліп, бір күннің ішінде жергілікті сала қызметкерлеріне тегін таратылды. Оның сыртында арнайы антисептикалық бұйымдар алынып, желі бойындағы жолшылар қауымына толықтай үлестірілді, – дейді ПЧ-42 мекемесінің кәсіподақ ұйымының төрағасы Жанатқали Құндақов.
Жалпы, аудан бойынша ұйымдастырылған қайырымдылық шараларына жергілікті Аягөз локомотив жөндеу депосы мен Аягөз локомотив пайдалану депосы айрықша үлес қосыпты. Аталмыш мекемелердің белсенділері жергілікті Жастар ресурстық орталығының еріктілерімен бірлесіп әкімдік берген арнайы тізім бойынша қиын жағдайда қалған жандарға қол ұшын созуда. Жергілікті жұртшылық осыған дейін де демеушілік шараларымен танылған аягөздік теміржолшылар қауымына алғыс айтуда.