Боранқұлдықтар бастамасы үлгі болғай

Маңғыстаудың Бейнеу ауданына қарасты Опорная станциясы орналасқан Боранқұл ауылының тұрғындарының дені теміржолшылар. Боранқұлдықтар Маңғыстауда коронавирусқа шалдығудың алғашқы дерегі анықталған бірінші күннен әрекет етіп, ауыл халқының денсаулығы үшін індетке қарсы күресті бастады.

Алдымен, тұрғындар өз ауылдарына өздері карантин енгізді. Енді облыста вирус жұқтыру дерегі 3-ке жеткесін, аталған тәртіпті одан әрі қатайта түсуде.

Елдімекеннің үстінен өтетін теміржол мен ауылға келетін тас жолға бақылау орнатты. Тұрғындардың өздері ерікті түрде кезекшілікте тұрып, сырттан келген бейтаныс адамдарды бақылап, жүріп бара жатқан пойыздан сыртқа шыққан жолаушының жергілікті халықпен байланыс орнатпауын қадағалап отырды.

− Елде болып жатқан жұқпалы індетке қарсы біздің ауылдың тұрғындары Боранқұлға сырттан адам кіргізбейік те, іштен ешкімді шығармайық та, деп бірауыздан келісіп отыр. Еріктілер автожолдарды, пойыздар жүріп тұрған кезде түскен-мінгендерді бақылап, адамдардың перроннан ұзап кетпеуін, өз вагонының алдында тұруын, әсіресе жергілікті адамдармен байланысқа түспеуін ескертіп тұрды. Бүгінде жолаушы пойыздары тоқтады, бірақ жүк құрамалары ара тұра келіп-кетіп жатыр, – деді бұл туралы ақпар берген Опорная станциясының бастығы Мұртаза Алдоңғаров.

Оның айтуынша станция кезекшілері пойыз келіп тоқтаған сәттері дауыскүшейткішпен жолаушылардың қауіпсіздік сақтауын, сыртқа шықпауын, шыға қалған жағдайда өз вагонынан ұзап кетпей, жергілікті адамдармен контактіде болмауын, қайта мінуін ескертіп отырған. Сондай ақ, перрондағы саудаға мүлде тиым салынған. Жақын жердегі дүкендердің бәрі де пойыздың келер уақытында жұмысын тоқтатып, есігін тарс жапқан. Әрине, қазір жолаушылар пойызы жүруін тоқтатқан. Бұл станцияның үстінен соңғы жолаушы пойызы сәуірдің басында өткен. Дегенмен, Борақұл халқы әлі де сақтақ шараларын мүлтіксіз сақтап отыр.

Ендеше, боранқұлдықтардың бастамасы әлі күнге арқасын кеңге салып коронавирусты елемей жүрген бәз біреулерге үлгі болса керек.