#Абай175: хакім Абайға арналған бейнеролик

Семей жүк тасымалы бөлімшесінің Жастар ұйымы Абайдың 175 жылдық мерейтойына орай арнайы бейнеролик әзірлеп шықты. Идеяның авторы жастардың өздері.

Басшылық тарапынан қолдау болғандықтан, межелі мерзім ішінде бірнеше минуттық, танымдық фильм даярлаған. Онда қарт Семей шаһарының ұлы ақын есімімен байланысты көрнекті орындарынан бастап, теміржол саласындағы өндірістік процесс барысына да арнайы шолу жасалған.

– Тек карантиндік шектеулер болғандықтан Абай мұражайына ғана кіре алмадық, сол тәрізді тағы да бірқатар мәдени орындарда арнайы түсірілім жасаудың мүмкіндігі болған жоқ. Әйтсе де, осынау бейнероликте хакім өсиет еткен ғылым мен білімге құштарлық, адал еңбек, жаңашылдыққа ұмтылыс сынды адам бойындағы ізгі қасиеттерді ашып көрсете алдық деп ойлаймын, – дейді бұл орайда пікір білдірген «ҚТЖ» ҰК» АҚ басқарма төрағасы жанындағы Жастар ісі жөніндегі кеңестің Семей ЖТ бөлімшесі бойынша жаңадан сайланған аймақтық өкілі Арайлым Қосанова.

Бейнероликте, сондай-ақ, семейлік теміржолшылардың ұл-қыздары Абайдың тағылымды өлеңдерін оқып, тыңдарманды ақын өсиетін орындауға шақырады.

Арнайы түсірілім мен монтаждау жұмыстарының барлығын ШЧ-29 инженері Тимофей Лома кин, Семей станциясының операторы Бауыржан Мұрат сынды елгезек жастар өздері әзірлепті. Бұл бағыттағы жұмыстарға сонымен қатар бөлімшедегі кәсіподақ ұйымының мүшелері де елеулі түрде жәрдем жасапты.

Еске сала кетейік, Президенттің қолдауымен 10 тамыз Абай күні болып жарияланды.