«Мектепке жол» акциясы: игіліктің ерте-кеші жоқ
«Мектепке жол» жалпы республикалық қайырымдылық акциясы Атырау жүк тасымалы бөлімшесінде әлі де жалғасуда.
«Игіліктің ерте-кеші жоқ» демекші, жыл сайын дәстүрлi түрде ұйымдастырылатын шара өңірде жарияланған карантинге қарамастан биыл да өтіп жатыр.
Акцияның мақсаты – 4 және одан көп балалары бар және отбасыларға жаңа оқу жылына дайындық кезеңінде көмек көрсету және әлеуметтік себептер бойынша балалардың мектепке бармай қалуын болдырмау. Биыл Атырау жүк тасымалы бөлімшесі бойынша 52 отбасы, 212 оқушыға, ал Атырау магистральдық желі бөлімшесі бойынша 55 отбасы, 225 оқушыға сөмкеден бастап барлық мектеп оқу-құралдары табыс етілді.
Оқу жылы басталып кеткенімен, карантинге байланысты аз қамтылған және көп балалы теміржолшылардың, оның ішінде вагон құрастырушылар, жүк қабылдап-жөнелтушілер, операторлар мен тауар кассирлері, жолшылар, пойыз диспетчерлері, локомотившілер, т.б. қарапайым жұмысшылардың балаларына сыйлық жасалды. Балалар ата-анасының жұмыс орнынан беріп жатқан көмекке дән риза болды.
– Бөлімше атынан менің балаларыма да сөмке және кеңсе тауарларын сыйға тартты. Балалар мәз, онлайн сабақтан гөрі, мектепке барып партаға қайтадан отыруды сағынып жүр.
Лайым індет жойылып, сол күндер жақын болсын! – дейді Құлсары жол дистанциясының жол жөндеушісі, 4 баланың әкесі Амангелді Қартқожақов.