Иманбек Зейкенов әлем жұлдызымен ән жазды
«Қазақстан теміржолшысы» газетінің тілшісі
Күні кешеге дейін Павлодар теміржолында жұмыс істеген Иманбек Зейкенов деген жас жігіт британиялық диджей Marshmello мен АҚШ әншісі Usher-мен бірлесіп трэк жазды. Жас таланттың әлемдік жұлдыздармен шығарған Too Much атты туындысы тыңдарман қауымға жол тартты.
Бұл туралы әннің жазылуына үлес қосқан үш музыканттың Instagram парақшаларында жарияланды. Белгілі болғандай, туындыда кімді жақсы көрсең, соның жанында болу керегі жайлы айтылған. «Marshmello және Иманбекпен бірге шығарған Too Much трэгім жарыққа шықты. Видеосы ертең. Сілтеме био-да» , – деп жазба қалдырған Usher қос өнерпазбен бірге түскен фотосын жариялады.
Imanbek лақап атымен белгілі қазақ баласы 2019 жылы Saint Jhn орындауындағы Roses әнінің ремиксімен бүкіл әлемге танылды. Ремикс дүниежүзі бойынша көптеген чартқа енсе, Shazam әлемдік тізімінде 3-орын алды. The New York Times басылымы қазақстандық Иманбек Зейкенов туралы мақала жариялаған болатын. Ол – Павлодар облысындағы Ақсу қаласының тұрғыны. Мамандығы – теміржолшы.
Музыкамен айналысу – хоббиі. Өкінішке орай, онымен тілдесіп сұхбат алмақ болғанымызда жуырда жұмыстан шығып кеткенін естідік. Несі бар, «өлеңге әркімнің-ақ бар таласы» демекші, жұрттың бәрі кәсіби музыкант болуы шарт емес, Иманбекке сәттілік тілейміз.