Теміржолшылар арасында екпе алушылар қатары көбейді

Семей ЖТ бөлімшесі бойынша коронавирус індетіне қарсы екпе салдыру күрт қарқын ала бастады. Өткен мамыр айында жандана бастаған шараның нәтижесінде теміржолшылар арасында аталмыш дертпен сырқаттанушылық деңгейі де күрт төмендеген. Бөлімше бойынша теміржолшылардың мұндай белсенділік танытуына себеп те жоқ емес. Өңір бойынша ақпараттандыру және түсіндіру жұмыстары нәтижелі жүргізілуде. Мерзімдік басылымдар мен әлеуметтік желідегі мағлұматтар көпшілікті екпе алуға жетелеуде. Соның нәтижесінде болар, бөлімшедегі кадр бөлімінің мамандары вакцина алғандардың тізімін күн санап жаңартып отыруға мәжбүр. Мәселен, қазіргі күнге дейін Семей ЖТ бөлімшесі бойынша мыңнан аса адам «Спутник-V» және «Hayat-Vax» екпелерін алыпты. Бұл – барша теміржолшылардың тең жартысына жуығы деген сөз. Бұл орайда мекемелер арасында ТЧЭ-22 қызметкерлерінің үлесі жоғары, 300-ден аса адам екпе қабылдаған. Ал, келесі орында Аягөздегі ТЧЭ-25 мекемесінің машинистері тұр. Сондай-ақ, НОД-6 мен Семей станциясындағы ВЧД-23 теміржолшыларының да белсенділігі жоғары. Бұл ретте Семей магистральдық желі бөлімшесі жедел жүргізілген жұмыстардың нәтижесінде екпе алу бойынша 40 пайыздан асып отыр. Осы орайда халықпен тығыз қарым-қатынаста жұмыс істейтін вокзал қызметкерлері толықтай вакцина алса, өзге мекемелер бойынша ерікті түрде екпе алу ісі қарқынды жүріп жатыр. Мұнымен қатар, ӘТЖК-ның Семей филиалы бойынша да бүгінгі күнге дейін 481 адам екпе алған. Одан кейінгі орында «Теміржолсу Аягөз» ЖШС мен «Қазтеміртранс» ЖШС-ның Семейдегі филиалы тұр. Жалпы, бүгінгі таңда Семей өңірі бойынша теміржолға қарасты еншілес мекемелердің барлығын қоса алғанда жалпы саны бес мыңнан аса адам екпенің әр түрін ерікті түрде алған. Бұл дәрігерлер мен мұғалімдерді, тәртіп сақшыларын қоспағанда Шығыстағы өте үлкен көрсеткіш саналады.