Шағын футбол жеңімпаздары сыйақыларын қайырымдылыққа жұмсады
Абай облысы бойынша меншікті тілші
Семей қаласында жыл сайын дәстүрлі түрде өтетін шағын футбол ойынының VII кубок жеңімпазы болған теміржолшылар командасы өздеріне тиесілі сертификатты қайырымдылық мақсатқа жұмсады. Шаһардағы түрлі мекемелер мен ұйымдар ойыншылары қатысқан, жалпы саны 15 команда бақ сынасқан біріншілікте топ жару Семей ЖТ бөлімшесі теміржолшылары үшін оңайға сақпағаны белгілі. Себебі, қатысқан командалар саны да көп әрі осыған дейін қала чемпионы болып жүрген еңбек ұжымдары жоғары дайындықпен келген болатын. Сондықтан да, семейлік теміржолшылар өзара іріктеуден өтіп, сайысқа осыған дейінгі сан түрлі додаларда топ жарып жүрген кіл мықтылар ғана қатысты. Атап айтсақ, ТЧЭ-24 тепловоз машинисі Арнұр Қожабеков, ЭЧ-18 электромеханигі Мират Айжақсин, пойыз құрастырушысы Арсен Тастанов, инженер-технолог Ержан Абдраимов жасыл алаң төрінде барын салды. Дегенмен, үздік командаларды ойсырата жеңген бөлімшенің «Локомотив» командасының ойыншылары «Adal» супермаркетінің дәстүрлі кубогын жеңіп алып, ұйымдастыру алқасының арнайы құрмет грамоталарымен марапатталды. Әйтсе де, теміржолшылар жүлде ретінде берілген 75 000 теңгенің сертификатын иеленуден мүлде бас тартты.
– Бөлімшенің кәсіподақ комитетімен кеңесе келе, әлеуметтік тұрғыдан аз қамтылған үш теміржолшы отбасына материалдық көмек ретінде жәрдем беруді ұйғардық. Осылайша, әр отбасыға 25 мың теңгеге азық-түлік қоржынын әзірлеп, кәсіподақ белсенділерімен бірге таратып шықтық. Әріптестеріміздің ризашылығы жоғары, – дейді команда капитаны, бөлімшедегі «Локомотив» спорт клубының нұсқаушысы, номері бірінші ойыншы Жанат Мойынбаев.
Теміржолшылар командасы ПЧ-40, ПЧ-39 және ЭЧ-18 мекемелеріндегі тұрмыстық қиындықтары бар үш отбасыға қайырымдылық ретінде көмек жасады. Айта кетер жайт, семейлік теміржолшылар осыған дейін де әлеуметтік аз қамтылған отбасыларға материалдық жәрдем көрсетуде көптеген игілікті іс-шаралар ұйымдастырып келді. Бұл – соның спортпен астасқан бір парасы ғана.