Семейлік теміржолшылар көмекке мұқтаж оқушыларды мектеп сөмкесімен қуантты
Абай облысы бойынша меншікті тілші
Семей ЖТ бөлімшесінде салалық кәсіподақ ұйымының ұйытқы болуымен «Мектепке жол» акциясы қарқынды түрде өткізіліп жатыр. Осыған дейін желі бойындағы барлық теміржол мекемелерінен көпбалалы және әлеуметтік тұрғыдан аз қамтылған отбасылар нақтыланып, арнайы тізім әзірленіп бекітілген болатын. Сәйкесінше кәсіподақ ұйымының өкілдері мектепке қажетті барлық заттарды, оқу-құралдарын түгендеп, санаулы күндер ішінде оқушы сөмкесін әзірлеп шықты. Бөлімше бойынша 124 балақайға аталмыш сыйлық табыс етілді. Бір ғана ТЧЭ-24 мекемесінде 36 бала осындай сыйлыққа ие болды. Ал, НЖС-6 бөлімшесі бойынша барлығы 112 балақайға оқу құралдары салынған оқушы сөмкесі табыс етілді. Бұл шаралардың сыртында кәсіподақтың орталық кеңесі тарапынан жіберілген тағы 12 оқушы рюкзагы Семей магистральдық желі бөлімшесінің көпбалалы қызметкерлеріне беріліпті. Жергілікті салалық кәсіподақ ұйымының төрағасы Алик Досановтың айтуынша, биылғы жылы мектеп табалдырығын аттайтын балдырғандар үшін әзірленген сыйлық қомақты. Күнделікті сабаққа қатысты құралдардың барлығы да қамтылған. Әрі жыл сайын 1-ші қыркүйек қарсаңында балаларын мектепке әзірлеп біршама шығынға бататын ата-аналар үшін бұл үлкен көмек болуда.