Арыста волейболдан іріктеу турнирі өтті
Өткен жексенбі күні Арыс қаласында «Қазақстандық салалық теміржол, автомобиль, әуе және су көлігі қызметкерлерінің кәсіби одағы» қоғамдық бірлестігінің ұйымдастыруымен волейболдан іріктеу турнирі өтті.
Аймақтағы теміржол мекемелерінене 8 команда қатысқан спорттық іс-шараның өтуіне кәсіподақ төрайымы Нағима Салықбаева мен спорт нұсқаушылары Елена Маньшина мен Көмек Асанов атсалысып, жоғары деңгейде ұйымдастырылды.
Арыс қаласындағы орталық стадионның жабық спорт залында өткен теміржолшылар турнирі тартысты да шиеленісті өрбіді. Жалпы, аймақта спорттың волейбол түрі өте жақсы дамыған деуге болады. Әйтсе де Арыс белгі беру және байланыс дистанциясынан құралған ШЧ-38 командасы ойыншыларының шеберлігі бәрінен асып түсіп, жүлделі бірінші орынды жеңіп алды. Байқау ережесі бойынша бағы жанған жеңімпаз команда Бурабайда өтетін жазғы турнирге жолдама алды.
Ал 2 және 3 орындарды сәйкесінше ВЧД30 командасы мен ТЧЭ-32 командасы өзара бөлісті. Жеңімпаз командалар кәсіподақ тарапынан лайықты марапатқа ие болды.