Еңбекті қорғау күніне орай спорттық іс-шара өтті
"Қазақстан теміржолшысы" газетінің Жамбыл облысындағы меншікті тілшісі
Дүниежүзілік еңбекті қорғау күніне орай «ҚТЖ-Жүк тасымалы» ЖШС Жамбыл филиалының спорт нұсқаушылары мен Тараз көліктегі оқу орталығы кәсіподақ ұйымы бірлесіп теміржолшылар арасында бұқаралық спорттық іс-шаралар өткізді.
Салауатты өмірді серік еткендер теміржолшылар қатарында аз емес. Бұл жолы да қатысушылар қарасы көп болды. Жиылғандар алдымен бағдарламаға сай өндірістік гимнастикадан жаттығулар жасады. «Өндірістік гимнастика – қызметкерлердің денсаулығын жақсарту, іскерлік қабілетін арттыру мақсатында жұмыс уақытында жүргізілетін дене шынықтыру шаралары. Оның екі түрі бар. Соның бірі – кіріспе гимнастика жұмыс бастар алдында жасалады. Бұл адамның ағзасын өндіріс жұмыстарына дайындайды. Гимнастиканың бұл түрі теміржолшылардың атқаратын жұмысына қарай белгіленеді. Қысқасы, практикалық дағдыны қалыптастырады», – дейді спорт нұсқаушысы Евгений Ким.
Әрі қарай сайысқа кіріскен теміржолшылар командалары арқан тарту мен гир көтеруден өзара жарысқа түсіп, жүректілер мен білектілер анықталды. Арқан тарту жарысынан «ВП» курсанттары жеңіске жетсе, «МЭ-19» командасы 2-орынды иеленді. Ал 3-орын «Жейсмар» тобына бұйырды. Гир көтеруден жүк тиеушілер арасында Айдос Қалибеков озық шықты. Электровоз машинистері командасынан Рүстем Жаулбеков 2-орыннан көрінді. Тепловоз машинисі Медет Сағатбековтің еншісіне тигені – жүлделі 3-орын.
Жеңімпаздарға дипломдар мен сыйлықтар тапсырылды.
