Шуда арқан тартудан жарыс өтті
"Қазақстан теміржолшысы" газетінің Жамбыл облысындағы меншікті тілшісі
Шу қаласында Жамбыл магистральдық желі бөлімшесіне қарасты мекемелердің ұлттық спорт – арқан тартудан жарыс өткізді. Қазақстан темір жолының 120 жылдығы аясында өткен шараға қатысқан командалар білек күшін танытты.
Алайда, тек білек күшіне сенген кейбір командалар тактиканы дұрыс таңдаған қарсыластарына есе жіберіп жатты. Ал «старт» белгісі берілгенде бірден қара күшке салып, қарсы топтың біраз мысын басқандардың жолы болған сәттер де көп. Ә дегенде, екпінге ерік беріп қойып, алайда соңына дейін беріспей, жеңісті қайта жұлып алғандар да бар.
– Жалпы арқан тарту – талаптары мен ережелері жеңіл спорт түрі болғанымен, жарыстың өзі оңай емес. Мұнда ең басты мәселе – ойыншыларды дұрыс таңдай білу. Нақтырақ айтсақ, арқанның басына білек күші мықты ойыншыны қою керек. Арқан тартыста күрестегідей, аяққа нық тұру да аса маңызды, – дейді Шу сигнализация және байланыс дистанциясы кәсіподақ ұйымының төрағасы Әзімбек Көкімов.
Жарыс қорытындысында алаң иелері ШЧ-35 командасы 1-орын алды. Ал сусыған арқанмен бірге жеңісті де қолдан берген ПЧМ жігіттері 2-орынды қанағат тұтты. Үштікті түйіндеген ЭЧ-22 де осал нәтиже көрсетпеді.
Үздік үш команда арнайы дипломдармен марапатталды. Жеңімпаздар мен жүлдегерлерге кәсіподақ ұйымы тарапынан арнайы сыйлықтар болды.