Ақтөбеде ұлттық ойындардан жарыс өтті
Ақтөбе облысы бойынша меншікті тілші
Наурыз мерекесі қарсаңында өңірлерде ұлттық спорт түрлерінен жарыс жалауы желбіреді. Ақтөбелік теміржолшылар тоғызқұмалақ, асық ату, қол күресі мен арқан тартудан жарыс өткізді.
Ақтөбе бөлімшесіне қарасты станциялар мен теміржол мекемелерінен келген 80-нен астам теміржолшы-спортшылар арасында өткен ұлттық ойындар ерекше көңіл күймен басталды. Жігіттер білек күші сынға түскен бәсекеде барын салды. Өңкей мығым, білекті теміржолшылардың осалы болмады.
«Теміржолшылар арасында ұлттық ойын түрлерінен өтіп жатқан сайыс ұлттық спорттың дамуы мен ұлттық құндылықтардың кеңінен насихатталуына тамшыдай болса да үлес деп есептейміз. Бүгін мықтылығын көрсеткен команда ҚТЖ чемпионатына қатысады», – деді спорт нұсқаушысы Нұргүл Батырхан.
Тоғызқұмалақ ойынынан ерлер арасында 1-орынды ШЧ-5 еншілесе, қыздар арасында ТЧЭ-5 Қандыағаш командасының ойыншылары алдына жан салған жоқ. Ал асық ату бойынша 1-орынды Қандыағаштан ДС командасы үздік атанып, қыздар арасындағы бес тас ойынында техникалық бөлімнен Гүлшат Бижанова жеңіске жетті.
Қол күресінен 80+ және 80 келі салмақтары бойынша шалқарлық теміржолшылар Айдын Бисеналин мен Алтынбек Насанбаев алдына жан салмады. 65+ және 65 келі салмақтарымен шыққан шалқарлық Әсел Жұмағұлова мен техникалық бөлімнен Гүлшат Бижанова жеңімпаз атанды.
Арқан тарту ойыны бойынша 1-орынды ШЧ-3 Шалқар, 2-орынды ПЧ-8 Шалқар, 3-орынды Қандыағаш әскерилендірген күзет мекемесі иеленді. Жүлделі орындарға ие болған теміржолшылар ҚТЖ чемпионатына жолдама алды.