Кіл мықтылар анықталды
Түркістан облысы бойынша меншікті тілші
Шымкентте теміржолшылардың кәсіби мерекесіне орай шағын футболдан кіл мықтыларды анықтаған байрақты бәсеке ұйымдастырылды. «Спорт лайф» спорт кешенінде өткен шараға 50-ге жуық теміржолшы-спортшы қатысты.
«Қазкөліккәсіп» ҚБ Шымкент филиалының спорт нұсқаушысы Көмек Асановтың айтуынша, салауатты өмір салтын ұстануға үндейтін сайысқа Түркістан облысы мен Шымкент қаласында орналасқан теміржол мекемелерінің қызметкерлері қатысқан. Атап айтқанда, ШЧ-37, ШЧ38, ПЧ-53, ПЧ-54, ДС-Манкент және ӘТЖК-Шымкент мекемелерінен құралған командалық сайыс өте тартысты ойынға ұласты. Ал әрбір команда 8 ойыншыдан құралды.
– Осындай шараны ұйымдастыру арқылы біз кәсіпорын, мекемелердегі командалық рухты оятып, әріптестер арасында өзара сыйластықты нығайтамыз. Одан бөлек, қоғам арасында салауатты өмір сүру салты насихаттала түседі, – дейді К.Асанов.
Айта кетейік, «Қазкөліккәсіп» ҚБ теміржолшылар арасында өзара байланыстың нығайып, жұмыс өнімділігін арттыру арқылы қоғамның дамуына елеулі үлес қосып келеді. Оның айқын дәлелін осындай іс-шаралардан байқауға болады. Ал енді осындай мақсатта ұйымдастырылған спорттық сайыста Арыс белгі беру және байланыс дистанциясы ұжымынан құралған топ үздік деп танылса, екінші орынға Шымкент жол дистанциясының командасы иелік етті. Ал Манкент станциясы ұжымының «ДС-Манкент» командасына үшінші орын бұйырды.
Жеңімпаз командаларға қаржылай сыйлық пен арнайы кубок табыс етілді.