QAZAQSTAN QYZMET CUP: «ҚТЖ» құрамасы алда
13 тамызда шағын футболдан өткен «QAZAQSTAN QYZMET CUP: түнгі футбол лигасы» ҚР Чемпионатында «ҚТЖ» ҰК» АҚ құрама командасы жеңіске жетті.
Мемлекеттік басқару субъектілері арасында өткен чемпионаттың BIRLIK Liga атты ақтық ойынында теміржолшылар командасы НұрСұлтан қаласы полиция департаментінің құрамасымен кездескен болатын. Тартысты өткен ойын барысында теміржол қызметкерлері үздік ойын көрсетті. ҚТЖ құрамасын компанияның еншілес ұйымдары және құрылымдық мекемелерінен жиналған мықты деген 23 спортшы құрады. Атап айтқанда, олар орталық аппарат пен «ҚТЖ-Жүк тасымалы» АҚ, «Жолаушылар тасымалы» АҚ, «ӘТЖК» АҚ, «KTZ Express» АҚ және «Кедентранссервис» АҚ сынды еншілес ұйымдар мен құрылымдық бөлімшелерден жинақталған. Биыл маусым айында өткен жартылай финалда да ҚТЖ командасы құрамындағы сала мамандары 18 ойын барысында жоғары қабілеттерін көрсетіп, алғашқы орындардан түспеген болатын. Ұйымдастырушылардың айтуынша, «QAZAQSTAN QYZMET CUP» турнирі – футболды жиі ойнай отырып, халықаралық аренада көрінуге лайық қабілет танытып жүрген қазақстандық мемлекеттік қызметкерлер мен мемлекеттік сыңайлы сектор компаниялары қызметкерлері үшін үлкен ойындарға қатысуға мүмкіндік беретін алғашқы қадамдардың бірі.