Шаршы тақта сайысына семейлік теміржолшылар қатысты
Абай облысы бойынша меншікті тілші
Семейлік теміржолшылар арасында спорттың тақталы ойын түрлері де жақсы дамыған. Соның ішінде ой еңбегін дамытатын шахматтың орны бөлек. Жуырда бөлімшедегі ерлер арасында сайыстың осы түрі бойынша кезекті біріншілік өткізіліп, жүлдегерлер анықталды.
Әдеттегісінше бұл жолғы жарыста да жас ерекшелігіне шектеу қойылған жоқ. Сол тәрізді «ойында субардинация болмайды» деп білетін теміржолшылар жарысына уақыт тауып бөлімше басшылығы да белсенді қатысты.
Шаршы тақта сайысына қатысушылар мол жиналды. Әсіресе жастардың қатары аса көп болды. Араларында байырғы бөлімше чемпиондары да, жаңадан сынға түскендер де болды. Шахматшылар өзара үш топқа бөлініп, топтық айналым бойынша бәсекеге түсті. Ойын барысында уақыт ұтқызбай, жылдам қимылдап, ойлы жүріс жасап, қарсыласын тықсыра жеңіске жеткендер көп болды. Дегенмен, ақтық финалға 6 ойыншы шығып, өзара жүлделі орындарды сарапқа салды.
Ақтық ойын барысы мейлінше шиеленісті өтті. Алма-кезек ойын кездесулері өткендіктен жеңімпаздарды анықтау оңайға түскен жоқ. Жарыстың нәтижесі бойынша бірінші орын НЖС-6 инженері Асқар Есенамановқа бұйырды. Ал екінші орынды Семей станциясының пойыз құрастырушысы Марат Қорабаев еншілесе, жүлделі үшінші орынды Семей ЖТ бөлімшесі басшысының бірінші орынбасары Ғабит Есқожанов жеңіп алды.
– Аталмыш сайыс түрі алдағы уақыттарда да жүйелі түрде ұйымдастырылатын болады. Қазіргі күндері жұмыстан тыс уақытта «Психологиялық жүктемеден арылу» бөлмесіне келіп, шахматтан жаттығып жүрген теміржолшылардың қатары көп, – дейді «Локомотив» спорт клубының нұсқаушылары.