Шығырлықтар жүк арту жоспарын 8 мың вагон цистернаға жеткізуді көздеп отыр
Арыстың іргесінде орналасқан Шағыр станциясы шағын болса да маңызы зор. Екінші класты станция Шағырдан негізінен мұнай өнімдері тиеледі.
Тоқсаныншы жылдары шаруасы шатқаяқтап қалған Шағырдың бағы қайта жанған кез станцияның жанынан «ҚазТрансОйл» акционерлік қоғамының шикі мұнай құю бекеті іске қосылған 2002 жылдан басталды. Мұнай компаниясына қарасты «Шағыр» мұнай құю бекетіне тартылған кірме жолдың эстакадаға сыйымдылығы – 40 вагон цистерна. Яғни тәулігіне 80 вагон цистерна шикі мұнай артуға есептелінген. Күні бүгінге дейін тұрақты жұмыс істеп келеді.
Шағыр станциясынан «PTC-operator» ЖШС мұнай тасымалдаушысы Өзбекстанның Кара- уылбазар және Ахунбабаев станциясындағы Бұхара және Ферғана шикі мұнай өңдеу зауы- тына экспортқа жүк тасымалдап жөнелтеді. Станция бастығы Бахытжан Қарынтаевтың айтуынша, шикі мұнай тиеу және тасымалдау бойынша өткен 2021 жылы жоспарға сай 39 845 тонна, яғни 650 вагон цистерна жүк артылған. Бұл – жақсы көрсеткіш.
Ал биылғы жылдың қаңтар-ақпан айында кірме жолда жүк тиеу болған жоқ. Себебі, қазіргі кезде станцияда қайта жөндеу жұ- мыстары жүргізіліп жатыр екен. Станция басшысы алдағы уақытта осы екі айдың орнын толтырып, жүк арту жоспарын 8000 вагон цистернаға жеткізуді жоспарлап отырғандарын айтты.
Тағы бір жаңалық, жүк түсіру және тасымалдау қызметінің артуына байланысты Монтайтас станциясы биыл 2022 жылдан бастап 4 класты станциялар тізіміне қосылып, статусы жоғарылады. Мұндағы «Аманкелді» кірме жолынан көбіне бидай өнімдері артылады. Станцияда талай жылдан бері осы салада тер төгіп келе жатқан тәжірибелі теміржолшылар көптеп саналады. Себебі, Шағыр мен Монтайтас та Арыс секілді теміржолшы кәсібін ерте меңгерген.
Станция бастығы «ҚТЖ» ҰК» АҚ басшысының Алғыс хатымен және «Кәсібі бойынша үздік» төсбелгісімен марапатталған еңбек озаттары – станция кезекшілері Н.Нұржанов, Ж.Мергенбаев, Д.Жаманбаев, Ғ.Сатынбеков, Ү.Аманжолов, Ғ.Қарынтаев, М.Билалов және пойыз құрастырушылар С.Бастарбеков, Д.Қалиев, жүк қабылдап-тапсырушы Д.Абдикеримов, тауар кассирлері С.Қожамұрат, А.Абышова сынды теміржолшылар негізінен еңбек өтілдері жүздеген жылдарды құрайтын әулеттер өкілі екенін жеткізді.