Теміржол мекемелері қысқы маусымға дайындалып жатыр
Тараз қаласы бойынша меншікті тілші
Жамбыл жүк тасымалы бөлімшесінде басталған күзгі комиссиялық байқау қыс алдындағы дайындық іспетті.
Дүйсенбі күні филиал директоры Молдахмет Қожабековтің төрағалығымен құрылған комиссия мүшелері Мойынты станциясынан жұмысты бастап, теміржол мекемелерінің алдағы қыс маусымына дайындығын, жалпы шаруашылыққа тексеріс жүргізді. Ал кеше Сарышаған станциясына болған комиссия бүгін Шығанақ станциясына келді. Ертең Отар станциясына аттанбақ.
– Қозғалыс құрамы, инфрақұрылымның ағымдағы жағдайы, өндірістік-техникалық нысандардың сақталуы, қозғалыс қауіпсіздігі, өрт қауіпсіздігі, қауіпсіздік және еңбекті қорғау – бәрі-бәрі қаралатын болады. Кемшіліктерді жіпке тізгендей етіп актіге тіркейміз. Жұмыс ауқымы үлкен. Жұмысшылардың кәсіби деңгейін де анықтай отырып, олардың жұмыс орындарын дұрыс ұйымдастырудағы біліктіліктері де сыналады. Комиссия мүшелері тарапынан жұмысшыларға әдістемелік көмектер де көрсетіледі. Белгіленген ережелерге сәйкес жұмысшыларға профилактикалық шаралардың жүргізілуі мен техникалық құжаттардың сауатты сүйемелденуі де тексеріледі, – дейді Жамбыл ЖТ бөлімшесінің бас инженері Дүйсен Сыдықов.
Жамбылда комиссиялық байқау 23 қыркүйекке дейін жүреді. Соңғы нүкте – Тараз телімаралық станциясы мен Талас станциясы. Байқау қорытындысы бойынша техникалық кеңес өтіп, кемшіліктер мен жетістіктері сараланатын болады.